ફી નિયમન સમિતિની જૂની પ્રક્રિયા રદ : સ્કૂલો માટે નવી કટ ઓફ ફી જાહેર કરાશે

February 3, 2018 at 12:11 pm


ગુજરાત સરકારના ફી નિર્ધારણ કાયદા સંદર્ભે સુપ્રીમ કોર્ટે વચગાળાનો ચૂકાદો આપ્યા પછી અત્યાર સુધી શાળાઓની ફી મુદ્દે જે પ્રક્રિયા થઇ તે રદબાતલ ગણવામાં આવશે. ચુકાદા મુજબ ૭ ફેબ્રુઆરી સુધીમાં હાઇકોર્ટના નિવૃત જજની અધ્યક્ષતામાં ફી રિવિઝન સમિતિની રચના કરી દેવાશે. સાથોસાથ સરકાર માધ્યમિક શિક્ષણ બોર્ડના ચેરમેનની અધ્યક્ષતામાં એક સમિતિની પણ સપ્તાહમાં રચના કરશે. આ સમિતિ શાળાઓ માટે નવી કટ ઓફ ફી ની જાહેરાત કરશે. હાલ શાળાઓ પ્રોવિઝનલ ફી સિવાય કંઇ લઇ શકશે નહીં. નવા ફી માળખાને લગતી સમગ્ર પ્રક્રિયા એપ્રિલના અંત સુધીમાં પૂર્ણ કરાશે તેવી જાહેરાત શિક્ષણ મંત્રી ભૂપેન્દ્રસિંહ ચૂડાસમાએ કરી છે.

તેમણે જણાવ્યું છે કે, ફી નિર્ધારણના કાયદાની મૂળ કલમ ૯ હેઠળ કટ ઓફ ફી જે ૧૫ હજાર, ૨૫ હજાર અને ૨૭ હજાર છે તેની મુક્તિ મર્યાદામાં ફેર વિચારણા કરવા માટે રાજ્ય સરકાર માધ્યમિક શિક્ષણ બોર્ડના ચેરમેનની અધ્યક્ષતામાં એક સમિતિની રચના કરાશે. આ કમિટી સમક્ષ વાલી મંડળ અને શાળા સંચાલકો એમ બન્ને રજૂઆત કરી શકશે. તે સાંભળ્યા પછી કટ ઓફ ફી નક્કી કરવાની સમગ્ર કાર્યવાહી સુપ્રીમ કોર્ટના ૧ ફેબ્રુઆરીના વચગાળાના ચૂકાદાથી ચાર સપ્તાહ એટલે કે ૨૮ ફેબ્રુઆરી સુધીમાં પૂર્ણ કરાશે. ફી અંગેની મુક્તિ મર્યાદાનું જાહેરનામું બહાર પાડયા પછી બે સપ્તાહ સુધીમાં શાળાઓએ ફી નિર્ધારણ કમિટી સમક્ષ દરખાસ્ત અને હિસાબો રજૂ કરવાના રહેશે. તેના ચાર સપ્તાહમાં સમિતિ દ્વારા ફી નક્કી કરવામાં આવશે. ફી રિવિઝન સમિતિને રજૂઆત મળે તેના એક મહિનામાં આખરી નિર્ણય કરવામાં આવશે. તે સાથે પ્રોવિઝનલ ફી અને તેનો અમલ ૨૦૧૭-૧૮થી કરવો કે નવા ૨૦૧૮-૧૯ના વર્ષથી કરવો તે સહિતની કાયદાકીય વિસંગતતા માટે એડવોકેટ જનરલનો અભિપ્રાય લેવામાં આવ્યો છે. આ ગાળા દરમિયાન શાળાઓ પ્રોવિઝનલ ફી જ લઇ શકશે.
શિક્ષણમંત્રી ચૂડાસમાએ મીડિયાને જણાવ્યું હતું કે, સરકારને ફી નિયમન અધિકારને સુપ્રીમ કોર્ટની સ્વીકૃતિ મળી છે તે વાત મહત્વની છે. ફી રિવિઝન કમિટીમાં પણ હાઇકોર્ટના બે નિવૃત જજ રહેશે. વાલીઓની રજૂઆત ચોક્કસપણે સાંભળવામાં આવશે પરંતુ વાલીઓને ફી કમિટીમાં સ્થાન નથી કે તેવો કોઇ ઉલ્લેખ સુપ્રીમ કોર્ટના વચગાળાના ચૂકાદામાં નથી.

ખાનગી શાળા સંચાલકોની શાળા બંધ કરવાની કે અન્ય પ્રકારની મુનસૂફી ચલાવી લેવાશે નહીં. જો શાળા સંચાલકો શાળા બંધ કરશે તો સરકાર તેને રાજ્યસાત કરીને ચલાવવા માટે પણ તેયાર છે. સરકાર વાલીઓ વતી જ કામ કરે છે તેવો વિશ્વાસ રાખવા પણ તેમણે અપીલ કરી હતી.

શિક્ષણ વિભાગના અગ્રસચિવ સુનયના તોમરે જણાવ્યું હતું કે, સુપ્રીમ કોર્ટે સીબીએસઇ સહિતના અન્ય બોર્ડની પણ તે રજૂઆત માન્ય રાખી નથી. આ કાયદો બધા બોર્ડને લાગુ પડશે. જો શાળાઓ કોશન મની પરત ના કરે તો તેની ફરિયાદ કરવા પણ તેમણે જણાવ્યું હતું. તેમણે કહ્યું હતું કે, કેટલાક શાળા સંચાલકો વિરુદ્ધમાં જાય છે પરંતુ સરકાર વાલીઓના હિતમાં કાયદાકીય લડાઇ લડવા તૈયાર છે.

print

Comments

comments

VOTING POLL