આઇપીએસ અધિકારી સંજીવ ભટ્ટે સુપ્રીમ કોર્ટમાં રજુ કરેલાં સોગંદનામા એડવોકેટ વી. એચ. કનારાની ઓફિસમાં તૈયાર થયા હોવાની માહીતીના આધારે પોલીસે તેમની ધરપકડ કરવાના ચક્રો ગતિમાન કર્યા હતા. આ દરમિયાન વકીલ કનારાએ પોતાની ધરપકડ સામે ‘સ્ટે’ માંગતી હાઇકોર્ટમાં રીટ પીટીશન કરી હતી. આજરોજ સુનાવણી દરમિયાન હાઇકોર્ટના જસ્ટીસ આર. એચ. શુકલ એ વકીલ કનારાની અદાલત મિત્રને સાથે રાખી માત્ર પૂછપરછ કરવા પોલીસને મંજૂરી આપી છે.
હાઇકોર્ટે પોતાના ચુકાદામાં એવું અવલોકન કર્યું હતું કે, વકીલ વી. એચ. કનારાની પૂછપરછ કરતાં પહેલાં નોટિસ તથા સમન્સ આપવું. પૂછપરછ દરમ્યાન અદાલત મિત્ર ડી. એમ. માંગુકિયાને સાથે રાખવા.
આ અંગેની વિગતવાર માહિતી એવી છે કે સરકાર સામે જંગે ચઢેલા આઇપીએલ અધિકારી સંજીવ ભટ્ટની ધરપકડ બાદ રીમાન્ડ અરજી ફગાવી દીધા બાદ પોલીસે આગળ વધારેલી તપાસમાં મુખ્યમંત્રી નરેન્દ્ર મોદી સામે આક્ષેપ કરવા માટે તૈયાર કરવામાં આવેલાં સોગંદનામામાં હાઇકોર્ટમાં પ્રેક્ટિસ કરતાં એડવોકેટ વી. એચ. કનારાની ઓફિસમાં થયા હોવાનું તપાસમાં ખુલવા પામ્યું હતું. જેને પગલે ધરપકડથી ગભરાઇ ગયેલા એડવોકેટ કનારાએ શુક્રવારે મોડી રાત્રે ધરપકડ પર સ્ટે માંગતી અરજી હાઇકોર્ટના જસ્ટીશ આર. એચ. શુકલ સમક્ષ કરી હતી. જે અરજીના અનુસંધાને હાઇકોર્ટના જસ્ટીસે પોલીસની કાર્યવાહી સોમવાર સુધી સ્ટે ફરમાવી દીધો હતો.
પોલીસને કારણદર્શક નોટીસ જારી કરી હતી. જે અંગેની આજરોજ સુનાવણી હાથ ધરવામાં આવી હતી. હાઇકોર્ટના જસ્ટીસ આર. એચ. શુકલે વકીલ કનારાની અદાલત મિત્રની હાજરીમાં પૂછપરછ કરવા પોલીસને મંજૂરી આપી છે.