રાજકોટ મહાપાલિકા સંચાલીત પ્રધુમન પાર્ક ઝૂની સિંહણ 'હિર'ને હૈદરાબાદ ઝૂના સિંહ 'અર્જુન' સાથે સંવનન કરાવવામાં આવતા 'હિર'ને સારા દિવસો રહ્યા હતા. દરમ્યાન ગત મધરાત્રે સિંહણ 'હિર'એ તેના પાંજરામાં જ એક સાથે ત્રણ–ત્રણ સિંહ બાળને જન્મ આપ્યો હતો. વહેલી સવારે ઝૂ સ્ટાફ ચેકીંગમાં નીકળતાં તેણે બચ્ચા જોયા હતા અને અધિકારીઓને જાણ કરી હતી. સિંહણ 'હિર' અને તેના બચ્ચાઓની તબીયત હાલ એકદમ તંદુરસ્ત છે અને માતા તથા બચ્ચાઓનું ઝૂ સ્ટાફ દ્રારા કલોઝસર્કીટ કેમેરા દ્રારા નિરીક્ષણ કરવામાં આવી રહ્યું છે.
વધુમાં વિગતો આપતા ઝૂ સુપ્રિન્ટેન્ડન્ટ હીરપરા અને વેટરનરી ઓફીસર ડો. ઝાકાસણીયાએ જણાવ્યું હતું કે ત્રણ સિંહ બાળનો જન્મ થતાં રાજકોટ ઝૂમાં આ સાથે સિંહ–સિંહણ અને સિંહ બાળની કુલ સંખ્યા ૧૫ થયેલ છે જેમાં ત્રણ સિંહ, ચાર સિંહણ, પાંચ સિંહ બચ્ચા અને ત્રણ નવજાત બચ્ચાનો સમાવેશ થાય છે.