મહાપાલિકાની વેસ્ટઝોન કચેરીની ટાઉન પ્લાનીંગ શાખાના આસી. ટાઉન પ્લાનર એમ.ડી. સાગઠીયા આજે સવારે સરપ્રાઈઝ ચેકીંગ રાઉન્ડમાં નીકળ્યા ત્યારે મવડી વિસ્તારની ધનલમી સુચીત સોસાયટીમાં રાતોરાત બે મકાન બની ગયાનું ધ્યાને આવતા તેમણે તાબડતોબ સ્થળ પર બુલડોઝર મંગાવી બન્ને ગેરકાયદે બાંધકામોનું ડિમોલીશન કરાવી નાખ્યું હતું. સવારના પહોરમાં મહાપાલિકાનો કાફલો ત્રાટકતા ધનલમી સુચીત સોસાયટીમાં લોકોના ટોળે ટોળાં ઉમટી પડયા હતા.
વધુમાં ટાઉન પ્લાનીંગ શાખાના સુત્રોના જણાવ્યા મુજબ મવડી ગામ નજીક આવેલી ધનલમી સૂચીત સોસાયટીમાં રામજી પટેલ નામના શખ્સ દ્રારા રાતોરાત ૭૦–૭૦ વારના મકાનો બનાવી નાખી તેના પર સ્લેબ ભરવામાં આવી રહ્યો હતો. દરમ્યાન સુચીત સોસાયટીમાં નવા મકાનનું થઈ રહેલુ ગેરકાયદે બાંધકામ ધ્યાને આવી જતા આસી. ટાઉન પ્લાનર એમ.ડી. સાગઠીયાએ તાબડતોબ બુલડોઝર બોલાવી બન્ને મકાનો તોડી પાડયા હતા