આઇપીએલ-6માં અનેક ભારતીય યુવા ખેલાડીઓ શ્રેષ્ઠ પ્રદર્શન કરી ટીમ ઇન્ડિયામાં સ્થાન મેળવવા ઉત્સુક હોય છે પરંતુ અમુક યુવા ખેલાડીઓએ શાનદાર પ્રદર્શન કરી પસંદગીકારોને વિચારતા કરી દીધા છે. આવા ખેલાડીઓમાં અમદાવાદના જસપ્રીત બુમરાહ અને મનપ્રીત જુનેજા, પંજાબના મનન વોહરા, આંધ્રપ્રદેશના હનુમા વિહારી અને ઝારખંડના રાહલ શુક્લાનો સમાવેશ થાય છે. આ યુવા ખેલાડીઓના બુલંદ સીતારાને જોઇ ભારતીય ક્રિકેટનું ભવિષ્ય ખૂબ જ ઉજળું દેખાઇ રહ્યું છે. આ યુવા ખેલાડીઓના પ્રદર્શન પર એક નજર કરીએ.
જસપ્રીત બુમરાહ (મુંબઇ ઇન્ડિયન્સ)
મુંબઇ ઇન્ડિયન્સ તરફથી રમી રહેલા અમદાવાદના જસપ્રીત બુમરાહે 4થી એપ્રિલે રોયલ ચેલેન્જર્સ બેંગ્લોર સામે ધારદાર બોલિંગ કરી 32 રનમાં ત્રણ વિકેટ ઝડપી હતી. જેમાં વિરાટ કોહલીનો પણ સમાવેશ થાય છે. જો કે આ મેચમાં રોયલ ચેલેન્જર્સની 2 રનથી જીત થઇ હતી.
મનપ્રીત જુનેજા (દિલ્હી ડેરડેવિલ્સ)
22 વર્ષીય અમદાવાદી મનપ્રીત જુનેજાએ 9મી એપ્રિલે દિલ્હી ડેરડેવિલ્સ તરફથી રમી મુંબઇ ઇન્ડિયન્સ સામે 40 બોલમાં 49 રનની શાનદાર ઇનિંગ રમી હતી. મનપ્રીત જુનેજાની મક્કમ બેટિંગ જોઇ પસંદગીકારો પણ વિચારતા થઇ ગયા હતાં.
સિધ્ધાર્થ ત્રિવેદી (રાજસ્થાન રોયલ્સ)
અમદાવાદના આ ફાસ્ટ બોલરે 8મી એપ્રિલે કોલકત્તા સામે માત્ર 23 રન આપી ત્રણ વિકેટ ઝડપી હતી અને તેના આ શાનદાર પ્રદર્શન બદલ તેની મેન ઓફ ધ મેચ તરીકે પણ પસંદગી કરવામાં આવી હતી. બીજી બાજુ રાજસ્થાન રોયલ્સે આ મેચ 19 રને જીત્યો હતો.
મનન વોહરા (કિંગ્સ ઇલેવન પંજાબ)
આઇપીએલ-6માં કિંગ્સ ઇલેવન પંજાબ તરફથી રમી રહેલો મનન વોહરા ફટાફટ બેટિંગ માટે પ્રખ્યાત થઇ ગયો છે. તેણે 7મી એપ્રિલે પૂણે વોરિયર્સ સામે માત્ર 28 બોલમાં અણનમ 43 રન બનાવી પંજાબને 8 વિકેટે જીત અપાવી હતી.
હનુમા વિહારી (સનરાઇઝર્સ હૈદ્રાબાદ)
કુમાર સાંગાકારાની આગેવાનીવાળી સનરાઇઝર્સ હૈદ્રાબાદ તરફથી રમી રહેલા હનુમા વિહારીએ રોયલ ચેલેન્જર્સ બેંગ્લોરના વિસ્ફોટક બેટસમેન ક્રિસ ગેઇલની પ્રથમ બોલમાં જ વિકેટ લઇ પોતાના કાંડાનું કૌવત બતાવી દીધું હતું. આ પછી તેણે અણનમ 44 રન પણ બનાવ્યા હતાં.
રાહલ શુક્લા (રાજસ્થાન રોયલ્સ)
કલકત્તા નાઇટ રાઇડર્સ 8મી એપ્રિલે રાહલ શુક્લાએ બે બોલમાં બે વિકેટ ઝડપી કોલકત્તાની કમર તોડી નાખી હતી. રાહલે પ્રથમ બોલમાં મનવીન્દર બિસ્લા અને બીજા બોલમાં જેક્સ કાલીસની વિકેટ ઝડપી હતી અને આ મેચમાં રાજસ્થાન રોયલ્સની 19 રને જીત થઇ હતી.
સ્ટુઅર્ટ બિન્ની (રાજસ્થાન રોયલ્સ)
ભારતીય ટીમના ભૂતપૂર્વ ક્રિકેટર રોજર બિન્નીના પુત્ર સ્ટુઅર્ટ બિન્નીએ 6ઠ્ઠી એપ્રિલે દિલ્હી ડેર ડેવિલ્સ સામે 20 બોલમાં 40 રન ફટકારી પસંદગીકારોને આશ્ર્ચર્યમાં મુકી દીધા હતાં. આ મેચમાં રાજસ્થાન રોયલ્સની પાંચ રને જીત થઇ હતી.