ગુજરાત ટાઇટન્સ પ્રથમ રમતા રમતા માત્ર 89 રનના સ્કોર પર રોકાઈ ગઈ હતી. દિલ્હીએ આ મેચ ખૂબ જ સરળતાથી 6 વિકેટથી જીતી લીધી છે.

દિલ્હી કેપિટલ્સે ગુજરાત ટાઇટન્સને એક તરફી રીતે 6 વિકેટથી હરાવ્યું છે. નરેન્દ્ર મોદી સ્ટેડિયમ ખાતે રમાયેલી આ મેચમાં પ્રથમ બેટિંગ કરતા ગુજરાતની ટીમ માત્ર 89 રનના સ્કોર સુધી મર્યાદિત રહી હતી. ગુજરાતના માત્ર 3 ખેલાડીઓ જ ડબલ ફિગર પાર કરી શક્યા. બીજી તરફ લક્ષ્યનો પીછો કરતી વખતે દિલ્હીએ ખૂબ જ સારી શરૂઆત કરી કારણ કે જેક ફ્રેઝર મેકગર્કે બીજી ઓવરમાં જ ટીમનો સ્કોર 20થી આગળ લઈ ગયો. મોટો શોટ રમવાનો પ્રયાસ કરતી વખતે મેકગર્ક 10 બોલમાં 20 રન બનાવીને આઉટ થયો હતો. તેણે પોતાની ઇનિંગમાં 2 ચોગ્ગા અને 2 છગ્ગા પણ ફટકાર્યા હતા. આ દરમિયાન સતત વિકેટો પડવાને કારણે દિલ્હી પણ સંઘર્ષની સ્થિતિમાં જણાઈ રહ્યું હતું.

પ્રથમ મેકગર્કનની વિકેટ પછી પૃથ્વી શો, શે હોપ અને અભિષેક પોરેલે કમાન સંભાળી હતી. લો-સ્કોરિંગ મેચમાં અભિષેકે માત્ર 7 બોલમાં 15 રન બનાવ્યા અને 2 ચોગ્ગા અને 1 છગ્ગા પણ ફટકાર્યા. પાવરપ્લેની 6 ઓવરમાં દિલ્હીનો સ્કોર 67 રન સુધી પહોંચી ગયો હતો, પરંતુ ટીમે 4 વિકેટ પણ ગુમાવી દીધી હતી. જો કે ટીમને જીતવા માટે માત્ર 23 રનની જરૂર હતી, પરંતુ સતત વિકેટો પડવાથી દિલ્હીના બેટ્સમેનો પર દબાણ સર્જાવા લાગ્યું. 

આવી સ્થિતિમાં કેપ્ટન રિષભ પંતે જવાબદારી લીધી, જેણે 11 બોલમાં 16 રનની ઇનિંગ રમીને ટીમની 6 વિકેટે જીત સુનિશ્ચિત કરી. દિલ્હીએ 67 બોલ બાકી રહેતા આ વિજય મેળવ્યો હોવાથી તેની નેટ રન રેટમાં ઘણો સુધારો થયો છે.

ફોર્મની વાત કરીએ તો, ગુજરાતે અત્યાર સુધીમાં 6 મેચમાં 3 જીત નોંધાવી છે અને છેલ્લી જીત રાજસ્થાન રોયલ્સ સામે મળી હતી. જ્યારે દિલ્હી કેપિટલ્સની સ્થિતિ બહુ સારી નથી અને ટીમે 6માંથી 4 મેચ હારી છે, પરંતુ છેલ્લી મેચમાં તેણે લખનૌને તેના હોમ ગ્રાઉન્ડ પર હરાવ્યું હતું.