ઈન્ડિયન પ્રીમિયર લીગ 2024ની 8મી મેચમાં સનરાઈઝર્સે મુંબઈ ઈન્ડિયન્સ સામેની મેચમાં આઈપીએલના ઈતિહાસમાં સૌથી વધુ સ્કોર બનાવવાનો રેકોર્ડ બનાવ્યો. મુંબઈ સામેની મેચમાં ટોસ હાર્યા બાદ પ્રથમ બેટિંગ કરવા ઉતરેલી સનરાઈઝર્સ ટીમે ટ્રેવિસ હેડ, અભિષેક શર્મા અને હેનરિક ક્લાસેનની અર્ધશતકની મદદથી નિર્ધારિત 20 ઓવરમાં 277 રન બનાવ્યા હતા. 

આઈપીએલના ઈતિહાસમાં કોઈપણ ટીમનો આ સૌથી મોટો સ્કોર છે. આ પહેલા IPLમાં સૌથી વધુ સ્કોર બનાવવાનો રેકોર્ડ રોયલ ચેલેન્જર્સ બેંગ્લોરના નામે હતો. જેણે વર્ષ 2013માં પુણે વોરિયર્સ સામે 263 રન બનાવ્યા હતા.

સનરાઇઝર્સ ટીમ માટે સૌથી પહેલા ટ્રેવિસ હેડે 18 બોલમાં આ સિઝનની સૌથી ઝડપી ફિફ્ટી ફટકારી હતી. આ પછી અભિષેક શર્માએ આ રેકોર્ડ તોડ્યો અને 16 બોલમાં શાનદાર ફિફ્ટી ફટકારી. આ સિઝનમાં હેડની આ પ્રથમ મેચ છે. તેણે 24 બોલમાં 62 રન બનાવ્યા હતા. જ્યારે અભિષેકે 23 બોલમાં 63 રનની ઇનિંગ રમી હતી. 

આ પછી અંતમાં હેનરિચ ક્લાસને 34 બોલમાં અણનમ 80 રન અને એડન માર્કરામે 42 રનની ધમાકેદાર ઇનિંગ રમીને ટીમને ઐતિહાસિક સ્કોર સુધી પહોંચાડી હતી. મુંબઈ તરફથી હાર્દિક પંડ્યા, ગેરાલ્ડ કોએત્ઝી અને પીયૂષ ચાવલાએ 1-1 વિકેટ લીધી હતી.