અમેરિકાના ન્યૂયોર્ક શહેરમાં એક ભારતીય યુવકના ઘોડાગાડીમાંથી પડી જવાથી થયેલા મોત પછી ઘોડાગાડીની સવારી પર પ્રતિબંધ મૂકવાની દિશામાં મોટો નિર્ણય લેવાયો છે. ન્યૂયોર્ક સિટી કાઉન્સિલે જૂન ૨૦૨૮થી શહેરમાં ઘોડાગાડીની સવારી બંધ કરવાના વિધેયકને મંજૂરી આપી છે. આ નિર્ણયથી ન્યૂયોર્કના સેન્ટ્રલ પાર્ક અને આસપાસના વિસ્તારોમાં દાયકાઓથી ચાલતી પ્રવાસીઓની લોકપ્રિય ઘોડાગાડીની સવારી બંધ થવાનો માર્ગ ખૂલ્યો છે.સિટી કાઉન્સિલમાં ગુરુવારે યોજાયેલા મતદાનમાં વિધેયકની તરફેણમાં ૪૦ સભ્યોએ મત આપ્યા હતા, જ્યારે સાત સભ્યોએ વિરોધ કર્યો હતો. બે સભ્યો મતદાનથી દૂર રહ્યા હતા. જોકે વિધેયક પસાર થવાથી પ્રતિબંધ તાત્કાલિક અમલમાં આવ્યો નથી. તેની કાનૂની પ્રક્રિયા અને સંભવિત અદાલતી પડકારો હજુ બાકી છે.આ વિવાદના કેન્દ્રમાં ૧૮ વર્ષીય ભારતીય પ્રવાસી રોમાંચ મહાજનનું મોત છે. રોમાંચ પોતાના પરિવાર સાથે ન્યૂયોર્કની મુલાકાતે ગયા હતા. ૧૭ જૂને ઘોડાગાડીની સવારી દરમિયાન તેમનો જીવ ગયો હતો. અહેવાલ મુજબ પરિવારનો ફોટો પાડવા ઘોડાગાડીનો ચાલક થોડા સમય માટે દૂર ગયો ત્યારે ઘોડો અચાનક બેકાબૂ થઈ દોડવા લાગ્યો હતો. તે દરમિયાન રોમાંચ ગાડીમાંથી નીચે પડી ગયા હતા. ગંભીર ઈજાને કારણે તેમનું મોત થયું હતું.આ દુર્ઘટના પછી ઘોડાગાડીની સવારીની સલામતી અંગેની ચર્ચા વધુ ઉગ્ર બની હતી. ન્યૂયોર્કના મેયર ઝોહરાન મમદાનીએ પ્રતિબંધને સમર્થન આપ્યું છે. બીજી તરફ અમેરિકન પ્રમુખ ડોનાલ્ડ ટ્રમ્પે આ નિર્ણયનો વિરોધ કર્યો છે. તેમના કહેવા પ્રમાણે ઘોડાગાડીઓ ન્યૂયોર્કના ઇતિહાસ અને પરંપરાનો મહત્ત્વપૂર્ણ ભાગ છે.ટ્રમ્પે એવો સવાલ પણ ઉઠાવ્યો હતો કે સેન્ટ્રલ પાર્કમાં વાહન અકસ્માતો થતાં હોવા છતાં કાર પર પ્રતિબંધ નથી મૂકવામાં આવતો તો ઘોડાગાડીઓ માટે જુદો માપદંડ કેમ રાખવામાં આવી રહ્યો છે?આ નિર્ણયનો વિરોધ ઘોડાગાડી વ્યવસાય સાથે સંકળાયેલા લોકો પણ કરી રહ્યા છે. ટ્રાન્સપોર્ટ વર્કર્સ યુનિયને વિધેયક કાયદો બને ત્યારે અદાલતમાં પડકારવાની જાહેરાત કરી છે. યુનિયનના મતે પ્રતિબંધથી સંચાલકોના વ્યવસાય અને આજીવિકા પર ગંભીર અસર પડશે.શહેરના વહીવટીતંત્ર માટે હવે બે પડકાર છે. એક તરફ પ્રવાસીઓની સલામતી અને પ્રાણીઓના કલ્યાણની ચિંતા છે, જ્યારે બીજી તરફ આ વ્યવસાય સાથે જોડાયેલા કામદારોના પુનર્વસનની જવાબદારી છે. ભારતીય યુવકના મોત પછી ઊભા થયેલા પ્રશ્ને આખરે ન્યૂયોર્કની એક જૂની પરંપરાનું ભવિષ્ય જ બદલી નાખ્યું છે.