સ્કૂલ-કોલેજો બંધ, 24 કલાકમાં છ હજારથી વધુ નવા કેસ: વારાણસી, લખનઉ, કાનપુરની હાલત ખરાબ

દેશના અન્ય રાજ્યોની જેમ જ હવે ઉત્તર પ્રદેશમાં પણ કોરોનાવાયરસ મહામારીએ ગંભીર પરિસ્થિતિ પેદા કરી દીધી છે અને દિન-પ્રતિદિન નવા કેસ ભારે ગતિ સાથે બહાર આવી રહ્યા છે ત્યારે રાજ્ય સરકારે લખનઉ વારાણસી કાનપુર સહિતના અનેક શહેરોમાં નાઈટ કર્ફ્યું લગાવી દીધું છે.

છેલ્લા 24 કલાક દરમિયાન ઉત્તર પ્રદેશમાં 6000 થી પણ વધુ નવા કેસ બહાર આવ્યા છે અને તમામ સ્કુલ કોલેજો બંધ કરી દેવામાં આવી છે. 16મી એપ્રિલ સુધી રાત્રીનો કર્ફ્યું ચાલુ જ રહેશે. અલ્હાબાદ કાનપુર અને વારાણસી શહેરોમાં ભયંકર ગતિ સાથે કેસ બહાર આવી રહ્યા છે.

અન્ય એક અહેવાલ મુજબ કોરોનાવાયરસ વિરોધી રસી ખલાસ થઈ ગઈ છે ત્યારે વારાણસીમાં રસી કેન્દ્ર બંધ કરવાની ફરજ પડી છે. ઉત્તર પ્રદેશની સરકાર દ્વારા તત્કાળ પગલાની જાહેરાત કરવામાં આવી છે અને તમામ સરકારી તથા બીનસરકારી સ્કૂલ-કોલેજો 15મી એપ્રિલ સુધી બંધ રાખવાની સૂચના આપી દેવાઇ છે.

રાજ્ય સરકારના પ્રવક્તાએ મીડિયાને એવી માહિતી આપી છે કે સોળમી એપ્રિલના રોજ નવેસરથી પરિસ્થિતિની સમીક્ષા કરવામાં આવશે અને જરૂર રાખશે તો આ પગલાં લંબાવી દેવામાં આવશે. ઉત્તર પ્રદેશમાં પણ દવાખાનાઓ હાઉસફુલ થઈ રહ્યા છે.