સુત્રાપાડાના લોઢવા ગામે આજે વહેલી સવારે અંદાજે ચારેક વાગ્યા આસપાસ લોઢવા ગામે વાડી વિસ્તારમાં રહેતા ચુડાસમા રમેશ દાનાભાઈની વાડીમાં ચાર સિંહ આવી પહોંચ્યા હતા. જેમાં એક બાળ સિંહ ખુલ્લા કૂવામાં ખાબક્યો હતો. ખેડૂત રમેશભાઈને કૂવામાં કંઈક પડ્યાનો અવાજ આવતા કૂવામાં જોતાં એક સિંહ કૂવામાં હોવાનું જણાતા તાત્કાલિક વન વિભાગને જાણ કરી હતી.

વન વિભાગની ટીમ દોડી ગઈ
ઘટનાની જાણ થતાં રેન્જ ફોરેસ્ટર એન.એમ.પંપાણિયા, ડી.વી.મકવાણા, શીતલબેન ગોરડ, મોહિત વૈષ્ણવ સહિત ટ્રેકર ગાર્ડની રેસ્ક્યૂ ટીમ તુરંત ઘટનાસ્થળે દોડી ગઈ હતી અને સિંહને કૂવામાંથી બહાર કાઢવા કવાયત હાથ ધરી હતી. અંદાજે ત્રણેક કલાકની જહેમત બાદ બાળસિંહને વનની રેસ્ક્યૂ ટીમ દ્વારા સહીસલામત બહાર કાઢી લેવાયો હતો. વન વિભાગના જણાવ્યા અનુસાર અંદાજે 1થી દોઢ વર્ષના આ બાળ સિંહને સારવાર અર્થે અમરાપુર એનિમલ કેર સેન્ટર ખાતે ખસેડવામાં આવ્યો હતો.