શહેરમાં આપઘાતના પ્રયાસના બે બનાવ નોંધાયા છે. પુનિતનગરમાં રહેતા યુવકે રેસકોર્ષમાં બીમારીની અને ઝેરી દવા ભેગી કરી પી લઈ આપઘાતનો પ્રયાસ કર્યો હતો જયારે વાવડી રોડ પર વિશ્વકર્મા સોસાયટીમાં આધેડએ એસિડ પી લેતા બંનેને સારવાર માટે સિવિલ હોસ્પિટલમાં ખસેડવામાં આવ્યા છે.

પ્રાપ્ત વિગત મુજબ પુનિતનગરમાં જય ખોડિયાર સોસાયટીમાં રહેતા અને બોર્ડ રીપેરીંગનું કામ કરતા દીપકભાઈ પ્રવિણભાઇ વીસપરા (ઉ.વ.47)નામના યુવકએ રાત્રીના નવેક વાગ્યે રેસકોર્ષમાં આવેલી આર્ટ ગેલેરી પાસે બીમારીની વધુ પડતી ટીકડીઓ અને ઉપર ઝેરી દવા પી લેતા ઉલ્ટી ઉબકા કરવા લાગ્યા હતા. પસાર થતા કોઈ રાહદારીએ 108ને જાણ કરતા સિવિલ હોસ્પિટલમાં ખસેડી પરિવારને જાણ કરી હતી. યુવકને સંતાનમાં એક પુત્ર છે અને પોતાને 10 વર્ષથી માનસિક બીમારી હોય જેની દવા પણ ચાલુ હોવાનું કહ્યું હતું. વધુ તપાસ પ્ર.નગર પોલીસે હાથ ધરી છે.

જયારે બીજા બનાવમાં ગોંડલ રોડ પરની વિશ્વકર્મા સોસાયટી-2માં રહેતા બનેસંગ ચુડાસમા (ઉ.વ.52) નામના આધેડએ બપોરે વાવડી રોડ પર એસિડ પી લેતા સારવાર માટે સિવિલ હોસ્પિટલમાં ખસેડવામાં આવ્યા હતા. બનાવ અંગે હોસ્પિટલ ચોકીના સ્ટાફે તાલુકા પોલીસને જાણ કરી હતી. બળુભા કારખાનામાં કામ કરે છે અને સંતાનમાં એક દીકરો દીકરી છે. આધેડને માનસિક તકલીફ હોય જેની દવા પણ ચાલુ છે. વધુ તપાસ પોલીસે હાથ ધરી છે.