બેડી ચોકડી પાસે નદીના પટમાં યુવકની લાશ મળી હોવાની જાણ થતા આજીડેમ પોલીસ દોડી ગઈ હતી અને મૃતદેહને પીએમ માટે સિવિલ હોસ્પિટલ ખસેડી ઓળખ મેળવી હતી. મૃતદેહ ભગવતીપરાના હિરેન જાદવ હોવાનું ખુલ્યું હતું.

પ્રાપ્ત વિગત મુજબ આજે સવારે બેડી ચોકડી પાસે નદીના પટમાં યુવકનો મૃતદેહ પડ્યો હોવાનું જોવા મળતા લોકોના ટોળા એકઠા થઇ ગયા હતા અને કોઈએ 108 અને પોલીસને જાણ કરતા 108ના ઇએમટીએ જોઈ તપાસી મૃત જાહેર કર્યો હતો. બનાવના પગલે આજીડેમ પોલીસ પણ પહોંચી પંચરોજ કામ કરી મૃતદેહને પીએમ માટે સિવિલ હોસ્પિટલ ખસેડી ઓળખ મેળવવા તજવીજ હાથ ધરી હતી. યુવક પાસેથી મળેલા ડોક્યુમેન્ટમાં તેનું નામ હિરેન સોમાભાઈ જાદવ (ઉ.વ.34) હોવાનું સામે આવ્યું હતું. પરિવારજનોને જાણ થતા હોસ્પિટલ દોડી ગયા ગયા હતા. યુવકને મોઢાનું કેન્સર હોવાનું પરિવારજનોએ જણાવ્યું હતું. યુવક આટો મારવા ગયો હોય ત્યારે જ બેભાન થઇ જતા મૃત્યુ થયાનું લાગી રહ્યું છે.