ગઈકાલે ઠાકુર બાંકેબિહારી મંદિરમાં ભક્તોના વધતા દબાણને કારણે પરિસ્થિતિ કાબુ બહાર થઈ ગઈ હતી. ભીડમાં કચડાઈ જવાથી એક મહિલા ભક્તનો પગ ફ્રેક્ચર થઈ ગયો. તેમને સારવાર માટે હોસ્પિટલમાં દાખલ કરવામાં આવ્યા હતા. પાંચ અન્ય મહિલાઓની હાલત પણ બગડી ગઈ હતી. મંદિરમાં હાજર ડોક્ટરોની ટીમે દરેકને પ્રાથમિક સારવાર આપી હતી. ત્યારબાદ તેમની સ્થિતિમાં સુધારો થયો. વધતી જતી ભીડને કારણે વહીવટી અને સુરક્ષા વ્યવસ્થા અપૂરતી જણાતી હતી.

હોળી પર ઠાકુરજીના દર્શન કરવા માટે ભક્તોનો પ્રવાહ વૃંદાવન પહોંચી રહ્યો છે. ગઈકાલે રજા હોવાથી ભક્તોની સંખ્યા એટલી વધી ગઈ કે તેને નિયંત્રિત કરવી મુશ્કેલ બની ગઈ. ધક્કામુક્કી વચ્ચે મંદિર પરિસરની અંદર અને બહાર પરિસ્થિતિ કાબુ બહાર જણાતી હતી. આ દરમિયાન કોલકાતાથી દર્શન કરવા આવેલા સંદીપ ગુપ્તાના પત્ની નેહા ગુપ્તા નીચે પડી ગયા. જ્યાં સુધીમાં તેમને ઉભા કરવામાં આવ્યા એટલીવારમાં તો ઘણા ભક્તો તેમના પગ પરથી પસાર થઈ ગયા હતા. તેમને પગમાં ઈજા થઈ. તેમને સારવાર માટે હોસ્પિટલમાં દાખલ કરવામાં આવ્યા હતા, જ્યાં તેમના પગમાં ફ્રેક્ચર હોવાનું બહાર આવ્યું.

બીજી તરફ દિવસભર મહિલા ભક્તોની ભીડમાં પરિસ્થિતિ વધુ ખરાબ થતી ગઈ. દિલ્હીથી આવેલી નિકિતા મંદિરમાં દર્શન કરતી વખતે ભીડમાં ફસાઈ ગઈ હતી. ગભરાટને કારણે તે બેભાન થઈ ગઈ. આ ઉપરાંત કોલકાતા નિવાસી વૃદ્ધ મહિલા ગાયત્રી અને તેમની પુત્રી મૌની પણ બેભાન થઈ ગઈ. મંદિરમાં હાજર ટીમ દ્વારા ત્રણેયને સારવાર આપવામાં આવી હતી. ત્યારબાદ તેમની સ્થિતિમાં સુધારો થયો. સાંજના દર્શન દરમિયાન, ભીડને કારણે હાપુડની તૃષા શર્મા અને શીતલની તબિયત પણ બગડી ગઈ હતી. ચક્કર આવવાને કારણે બંને નીચે પડી ગયા હતા. સારવાર આપ્યા બાદ તેમને પાછા મોકલી દેવામાં આવ્યા હતા.

બાંકેબિહારી મંદિરમાં સુરક્ષા માટે તૈનાત પોલીસકર્મીઓ પણ ભીડને કારણે લાચાર દેખાતા હતા. ભીડ એટલી વધુ હતી કે પોલીસકર્મીઓ પણ તેમની વચ્ચે ફસાઈ ગયા હતા. તેમને ભક્તોને નિયંત્રિત કરવામાં મુશ્કેલી પડી રહી હતી. ભીડને ધ્યાનમાં લેતા પોલીસ વ્યવસ્થા ઓછી પડી રહી હતી. જ્યાં સુધી વહીવટીતંત્ર કોઈ નક્કર પગલાં નહીં ભરે ત્યાં સુધી પરિસ્થિતિમાં સુધારો થવો મુશ્કેલ છે.

ગયા અઠવાડિયે જ સુરક્ષા હેતુઓ માટે અને ભક્તોની ગણતરી માટે બાંકે બિહારી મંદિરમાં ડોર ફ્રેમ મેટલ ડિટેક્ટર મશીન સ્થાપિત કરવામાં આવ્યું હતું પરંતુ ભીડના વધતા દબાણને કારણે શનિવારે સાંજે આ મશીન બગડી ગયું. ગઈકાલે મંદિર પ્રશાસને મશીન દૂર કરવું પડ્યું. આનાથી મંદિરની સુરક્ષા પર પણ અસર પડી રહી છે.