બોર્ડર-ગાવસ્કર ટ્રોફીની ચોથી ટેસ્ટ માટે ભારતીય ટીમ મેલબોર્નમાં હાજર છે. બોક્સિંગ ડે ટેસ્ટ મેલબોર્નમાં રમાવાની છે, જે 26 ડિસેમ્બરથી શરૂ થશે. ટીમ ઈન્ડિયા મેચની તૈયારીમાં વ્યસ્ત છે. દરમિયાન, બીસીસીઆઈએ સોશિયલ મીડિયા દ્વારા એક વીડિયો શેર કર્યો, જેમાં ફિલ્ડિંગ કોચ ટી દિલીપે ખેલાડીઓ વચ્ચે એક રસપ્રદ ફિલ્ડિંગ સ્પર્ધાનું આયોજન કર્યું. સ્પર્ધા જીતવા માટે 300 ડોલરનું ઇનામ પણ આપવામાં આવ્યું હતું.

આ સ્પર્ધા માટે ફિલ્ડિંગ કોચે 6-6 ખેલાડીઓના ત્રણ જૂથ પસંદ કર્યા. ત્રણેય ગ્રુપમાં યુવા ખેલાડીઓને કેપ્ટન બનાવવામાં આવ્યા હતા. સરફરાઝ ખાન ગ્રુપ-1માં કેપ્ટન હતો. સરફરાઝ ખાન, વિરાટ કોહલી, દેવદત્ત પડીક્કલ, અભિમન્યુ ઇશ્વરન, હર્ષિત રાણા અને યશસ્વી જયસ્વાલ આ ગ્રૂપમાં સામેલ હતા.

મોહમ્મદ સિરાજને ગ્રુપ-2માં કેપ્ટન બનાવવામાં આવ્યો હતો. આ ગ્રુપમાં સિરાજ, રોહિત શર્મા, ઋષભ પંત, કેએલ રાહુલ, આકાશદીપ અને નીતિશ કુમાર રેડ્ડી સામેલ હતા.

ત્યારબાદ ગ્રુપ-3માં ધ્રુવ જુરેલને કેપ્ટન બનાવવામાં આવ્યો હતો. આ જૂથમાં ધ્રુવ જુરેલ, જસપ્રિત બુમરાહ, રવિન્દ્ર જાડેજા, શુભમન ગિલ, પ્રસિદ્ધ કૃષ્ણા અને વોશિંગ્ટન સુંદરનો સમાવેશ થાય છે.

સ્પર્ધા શું હતી?

સ્પર્ધા માટે ત્રણ થ્રો પોઈન્ટ બનાવવામાં આવ્યા હતા. તમામ થ્રો પોઈન્ટને અલગ અલગ પોઈન્ટ આપવામાં આવ્યા હતા. તમામ ગ્રુપના દરેક ખેલાડીને ફેંકવાની તક આપવામાં આવી હતી. સૌથી વધુ પોઈન્ટ મેળવનાર ટીમને વિજેતા જાહેર કરવામાં આવી હતી.

ધ્રુવ જુરેલની ટીમનો વિજય થયો

ધ્રુવ જુરેલની આગેવાની હેઠળની ટીમે સ્પર્ધા જીતી હતી. જીત બાદ ફિલ્ડિંગ કોચે ધ્રુવ જુરેલને 300 ડોલરનું ઇનામ આપ્યું હતું. જીત્યા બાદ જુરેલ ખૂબ જ ખુશ દેખાતો હતો. જુઓ વિડિયો...