શનિવારે જામનગર-હૈદરાબાદ ફલાઇટમાં બોમ્બ હોવાની ધમકી મળ્યાના પગલે તાકીદે તંત્ર હરકતમાં આવ્યુ હતું અને જુદી જુદી ટુકડીઓ દ્વારા એરપોર્ટ ખાતે ધસી જઇ બોમ્બ સ્કવોડ સહિતની ટીમ દ્વારા સધન ચેકીંગ કરાતા કઇ મળ્યુ ન હતું અને બોમ્બની વાત અફવા હોવાનું સાબીત થયુ હતું આથી તંત્ર સહિતનાઓએ રાહતનો દમ લીધો હતો.જામનગર હૈદરાબાદ ફલાઇટમાં બોમ્બ હોવાની ઇમેલ દ્વારા માહિતી મળી હતી જેના પગલે કલેકટર અને એસપીની સુચનાથી પોલીસની જુદી જુદી ટુકડીઓમાં દોડધામ મચી હતી, એરપોર્ટ ખાતે ટુકડીઓ પહોચી હતી અને તાકીદના ધોરણે સધન ચેકીંગ કરતા અફડાતફડીનો માહોલ જોવા મળ્યો હતો. બોમ્બ સ્કવોડ, એલસીબી, એસઓજી, સીટી પોલીસ સહિતનો જંગી કાફલો ચેકીંગમાં જોડાયો હતો પેસેન્જરોનો સામાન પણ ચેક કરાયો હતો અને કલાકોના ચેકીંગ બાદ કશુ વાંધજનક મળ્યુ ન હતું અને એ પછી મોડેથી ફલાઇટને રવાના કરવામાં આવી હતી. આમ અન્ય રાજયની માફક જામનગરમાં પણ શનિવારે ફલાઇટને વિસ્ફોટક પદાર્થ અંગેની ધમકીના પગલે દોડધામ મચી હતી કંઇ નહીં મળતા તંત્રએ હાશકારો અનુભવ્યો હતો.