જેતપુર તાલુકા પોલીસ મથકના સ્ટાફે જેતપુર જુનાગઢ રોડ પર ચેકિંગ દરમિયાન દારૂ ભરેલી ઇકો કાર ઝડપી લીધી હતી. પોલીસે ઇકો કારમાંથી રૂપિયા ૩.૬૧ લાખની કિંમતનો 1034 બોટલ દારૂનો જથ્થો કબજે કર્યો હતો. દારૂના આ જથ્થા સાથે જૂનાગઢના શખસને ઝડપી લીધો હતો. પોલીસે દારૂનો આ જથ્થો ઇકો કાર અને મોબાઈલ સહિત કુલ રૂપિયા 6.81 લાખનો મુદ્દામાલ કબજે કર્યો હતો. ઝડપાયેલા આ શખસની પૂછતાછ કરતા દારૂ પ્રકરણમાં વંથલી પંથકના શખસનું નામ ખુલ્યું હતું. જેથી પોલીસે તેને ઝડપી લેવા તપાસ હાથ ધરી છે.

દારૂના આ દરોડાની જાણવા મળતી વિગતો મુજબ, જેતપુર ડીવાયએસપી રોહિતસિંહ ડોડીયાના માર્ગદર્શન હેઠળ જેતપુર તાલુકા પોલીસ સ્ટેશનના પીઆઇ એ.એમ.હેરમાની રાહબરી હેઠળ ટીમ પેટ્રોલિંગમાં હતી દરમિયાન મળેલી બાતમીના આધારે જેતપુર જુનાગઢ હાઇવે પર શંકાસ્પદ ઇકો કારને પોલીસે અટકાવી હતી. પોલીસે આ ઇકો કારની તલાશી લેતા તેમાંથી રૂપિયા ૩.૬૧ લાખની કિંમતનો 1034 બોટલ દારૂનો જથ્થો મળી આવ્યો હતો. જેથી પોલીસે ઇકો ચાલક ભરત અરજણભાઈ ભોગેસરા (ઉ.વ 31 રહે. લીરબાઈ પરા પાસે બિલખા રોડ, જુનાગઢ) ની ધરપકડ કરી હતી.

પોલીસે દારૂનો આ જથ્થો અને કાર સહિત કુલ રૂપિયા 6,81,492 નો મુદ્દામાલ કબજે કર્યો હતો. દારૂ સાથે ઝડપાયેલા ઇકો ચાલકની પૂછતાછ કરતા દારૂ પ્રકરણમાં વંથલીના ધંધુસર ગામના વિપુલ સુરાભાઈ સુતરેજાનું નામ ખુલ્યું હતું.જેથી પોલીસે આ બંને શખસો સામે ગુનો નોંધી અન્ય આરોપીને ઝડપી લેવા તપાસ હાથ ધરી છે.