પ્રાણીઓમાં પણ માનવીની જેમ જ સંવેદના અને કરુણા હોય છે. પશુઓ અને ખાસ કરીને શ્વાનની વફાદારીની મિસાલ અપાતી હોય છે પરંતુ આ યુગમાં પશુઓ પણ માનવી જેવું કૃત્ય કરી બેસે છે તેનો તાજો દાખલો કાનપુરમાંથી સામે આવ્યો છે.જે શ્વાનને મહિલાએ સંતાનની જેમ ઉચેર્યો હતો, ખુબ સાચવતી હતી એ જ શ્વાન ઘાતકી બન્યો હતો અને માલકિન પર નિર્દયી હુમલો કરી તેને ગંભીર ઈજા પહોચાડી હતી અને તેના લીધે મહિલાનું મોત નીપજ્યું હતું.

ઉત્તર પ્રદેશના કાનપુરના વિકાસ નગરમાં એક દુ:ખદ ઘટના બની, જ્યાં એક પાલતુ જર્મન શેફર્ડે તેની 80 વર્ષીય માલકિન પર હુમલો કરીને તેની હત્યા કરી દીધી. હાલમાં, મ્યુનિસિપલ કોર્પોરેશનની ટીમે કૂતરાને પોતાની કસ્ટડીમાં લઈ લીધો છે. આ ઘટના બાદ ફરી એકવાર પાલતુ કૂતરાઓની સુરક્ષા પર સવાલો ઉભા થયા છે.

મળતી માહિતી મુજબ, મોહની દેવી રવિવારે ઘરના આંગણામાં હતી. પછી તેના કૂતરાએ તેના પર હુમલો કર્યો. પરિવારને શરૂઆતમાં લાગ્યું કે કૂતરો કોઈ બહારના વ્યક્તિ પર ભસતો હશે, પરંતુ જ્યારે તેઓએ ચીસો સાંભળી ત્યારે તેઓ બહાર દોડી ગયા. ત્યાં સુધીમાં કૂતરાએ મહિલાના ચહેરા, પેટ અને કમર પર ગંભીર ઈજાઓ પહોંચાડી હતી, જેના કારણે તેનું ઘટનાસ્થળે જ મોત નીપજ્યું હતું.મોહની દેવી તેને બાળકની જેમ ઉછેરતા હતા.માહિતી મળતાં જ સ્થાનિક કાઉન્સિલરે પોલીસ અને મ્યુનિસિપલ કોર્પોરેશનને ફોન કર્યો. જે બાદ ટીમ ઘટનાસ્થળે પહોંચી અને ઘણી મહેનત બાદ કૂતરાને કાબુમાં લીધો. મોહિની દેવી કૂતરાને પોતાના બાળકની જેમ ઉછેરતી હતી, પરંતુ તે જ તેના મૃત્યુનું કારણ બન્યો.

ઘરમાં સાથે રહેતા લોકોએ પણ સાવધ રહેવું પડે તેવી સ્થિતિ

હાલમાં પોલીસ એ જાણવાનો પ્રયાસ કરી રહી છે કે કૂતરાએ અચાનક હુમલો કેમ કર્યો. આ ઘટનાએ પાલતુ કૂતરા રાખવાની સલામતી પર એક નવી ચર્ચા જગાવી છે. સ્થાનિક કાઉન્સિલરે માંગ કરી છે કે પાલતુ કૂતરાઓની નોંધણી ફરજિયાત હોવી જોઈએ. ઉપરાંત, જેમના ઘરમાં પાલતુ કૂતરા છે તેમણે પણ સાવધ રહેવું જોઈએ.