હિમાલયન રીજીયનમાં આવતીકાલ રાત્રીથી એક પ્રભાવશાળી વેસ્ટર્ન ડિસ્ટર્બન્સ ની અસર શરૂ થઈ જશે અને તે ઓછામાં ઓછા ત્રણ દિવસ સુધી ચાલશે. ચાલુ સિઝનમાં અત્યાર સુધીના સૌથી પ્રભાવશાળી એવા આ વેસ્ટર્ન ડિસ્ટર્બન્સના કારણે જમ્મુ કશ્મીર હિમાચલ પ્રદેશ ઉત્તરાખંડમાં હિમવર્ષા અને ભારે વરસાદની ચેતવણી આપવામાં આવી છે, આ ઉપરાંત દેશના અનેક રાજ્યોમાં પણ માવઠું થવાની આગાહી હવામાન ખાતા દ્વારા કરવામાં આવી છે.

હવામાન ખાતાના જણાવ્યા મુજબ આવતીકાલ રાતથી આ વેસ્ટર્ન ડિસ્ટર્બન્સની અસર શરૂ થઈ જશે અને તે તારીખ 20 સુધી ચાલુ રહેશે. જમ્મુ કાશ્મીર હિમાચલ પ્રદેશ ઉત્તરાખંડ ઉપરાંત પંજાબ હરિયાણા ઉત્તર પ્રદેશ ચંડીગઢ દિલ્હી પશ્ચિમ બંગાળ ઓડીસા અને ઝારખંડમાં પણ આ સિસ્ટમના કારણે વરસાદની ચેતવણી આપવામાં આવી છે.

વેસ્ટર્ન ડિસ્ટર્બન્સની અસર તારીખ 19 અને 20 ના રોજ વધુ જોવા મળશે. વર્તમાન એક સિસ્ટમના કારણે જમ્મુ કશ્મીર લદાખ હિમાચલ પ્રદેશ અને ઉત્તરાખંડમાં હિમવર્ષા તથા વરસાદ ચાલુ છે તેની માત્રામાં અનેકગણો વધારો થશે.

આવી જ રીતે આસામ પર એક સાયકલોનિક સર્ક્યુલેશન છવાયુ હોવાથી આસામ અરુણાચલ પ્રદેશ મેઘાલય નાગાલેન્ડ મણીપુર મિઝોરમ માં પણ વરસાદની ચેતવણી આપવામાં આવી છે.

ગુજરાતમાં આજે વાતાવરણમાં ફરી પલટો જોવા મળ્યો છે. ભેજનું પ્રમાણ વધી ગયું છે અને તેના કારણે સવારે ઝાકળ વર્ષા થઈ હતી. આકાશમાં ભેજવાળા વાદળો પણ જોવા મળી રહ્યા છે. દ્વારકા કંડલા નલિયા ઓખા પોરબંદર રાજકોટ સુરત વેરાવળમાં ભેજનું પ્રમાણ 85 થી 95 ટકા સુધીનું રહ્યું હોવાથી સવારે ઝાકળ જોવા મળી હતી.