ભારતીય બેટ્સમેનોને એક સમયે સ્પિનના માસ્ટર માનવામાં આવતા હતા. ભારતીય બેટ્સમેનો સ્પિનરોની બોલિંગમાં ખૂબ જ સારી રીતે રમ્યા છે. જેના કારણે સ્પિનરો તેમના માટે ક્યારેય સમસ્યારૂપ નથી બન્યા. જોકે હવે પરિસ્થિતિ બદલાઈ ગઈ છે. છેલ્લાં કેટલાંક વર્ષોમાં એવું જોવા મળ્યું છે કે ભારતીય બેટ્સમેનો સ્પિનરો સામે ઝઝૂમી રહ્યા છે. તાજેતરમાં ન્યુઝીલેન્ડ સામે રમાયેલી સીરીઝમાં પણ આવું જ જોવા મળ્યું હતું. ટીમ ઈન્ડિયાના પૂર્વ કેપ્ટન અને મહાન બેટ્સમેન સુનીલ ગાવસ્કરે ખુલાસો કર્યો છે કે શા માટે ભારતીય બેટ્સમેન સ્પિનર સામે નબળા દેખાય છે.

ભારતને તાજેતરમાં જ ઘરઆંગણે ત્રણ મેચની ટેસ્ટ સીરીઝમાં ન્યૂઝીલેન્ડ સામે 3-0થી હારનો સામનો કરવો પડ્યો હતો. ભારતે પ્રથમ વખત ઘરઆંગણે ત્રણ કે તેથી વધુ મેચોની ટેસ્ટ સીરીઝમાં ક્લીન સ્વીપનો સામનો કર્યો છે. ભારતીય ટીમ સાથે આવું પહેલા ક્યારેય બન્યું નથી. આ હાર ભારત માટે કલંક સમાન છે.

મહાન બેટ્સમેનોમાંના એક સુનીલ ગાવસ્કરે ટીમ ઈન્ડિયાના બેટ્સમેનોની ખામીઓને હાઈલાઈટ કરી છે જેના કારણે તેમને સ્પિન રમવામાં મુશ્કેલી થઈ રહી છે. ગાવસ્કરે કહ્યું છે કે વધુ મર્યાદિત ઓવરના બોલ સાથે રમવાને કારણે બેટ્સમેનો ટેસ્ટમાં હળવા હાથે રમવાનું ભૂલી ગયા છે અને સ્પિન રમવું ખૂબ જ જરૂરી છે.

તેમણે કહ્યું, "જ્યારથી લિમિટેડ ઓવરનું ક્રિકેટ વધુ લોકપ્રિય બન્યું છે ત્યારથી આવું થઈ રહ્યું છે. મર્યાદિત ઓવરોમાં બેટ્સમેન બોલને કડક હાથે રમે છે. ત્યાં તમે બોલને દબાણ કરો છો જેથી બોલ દૂર જાય. પછી ભલે બોલ સ્વિંગ થઈ રહ્યો હોય કે સીમ, મને લાગે છે કે તમારે તેને હળવા હાથથી રમવું જોઈએ, જો બંને હાથ હળવા ન કરી શકો ટો એક હાથને હળવો કરી રમવાની ટ્રાય કરવી જોઈએ, જેથી તમે બેટની ઝડપને નિયંત્રિત કરી શકશો."

ગાવસ્કરે કહ્યું, "આનાથી શું થશે કે જે બોલ બેટની કિનારી સાથે સ્લીપ થઇ જાય છે તે તમારી નજીક આવી જશે. બેટની ઝડપ એક મોટું કારણ છે કારણ કે હાલમાં ભારત ટેસ્ટ ક્રિકેટ કરતાં સફેદ બોલનું ક્રિકેટ વધુ રમી રહ્યું છે."

ગાવસ્કરે સ્પિનરોને રમવાની સલાહ પણ આપી છે. તેમણે કહ્યું છે કે ભારતીય બેટ્સમેનોએ સ્પિનરો સામે તેમની ચાલનો ઉપયોગ કરવો જોઈએ. ગાવસ્કરે કહ્યું, "બેટ્સમેનોએ તેમના સ્ટેપ્સનો ઉપયોગ કરવો જોઈએ, બોલની ટોચ પર પહોંચવું જોઈએ અને પછી ડ્રાઇવ કરવું જોઈએ. મને યાદ છે કે ઈયાન ચેપલ કહેતા હતા કે જે બેટ્સમેન તેમના સ્ટેપ્સનો ઉપયોગ નથી કરી શકતા તેમણે સ્પિનરો સામે સ્વીપ રમવું જોઈએ."