રાજકોટ નજીક આવેલા પારડી ગામે કારખાનેદારને રૂમમાં લોક કરી તસ્કરો મકાનમાંથી રૂ.૨ લાખ રોકડનો હાથફેરો કરી ગયા હતાં. આ અંગે કારખાનેદાર દ્વારા શાપર-વેરાવળ પોલીસ મથકમાં ફરિયાદ નોંધાવવામાં આવી છે. જેના આધારે પોલીસે ગુનો નોંધી તસ્કરોના સગડ મેળવવા તપાસ હાથ ધરી છે.

પારડીમાં શ્રીજી વાટીકા સોસાયટીમાં રહેતાં જીગ્નેશભાઈ ગણેશભાઈ ભુવા, (ઉ.વ. ૪૧)એ નોંધાવેલ ફરિયાદમાં જણાવ્યું હતું કે, તેઓ પારડી નજીક શીતળા માતાજી મંદિર પાસે જે.બી. મશીન ટુલ્સ નામે કારખાનું ચલાવી વેપાર કરે છે. તા. ૧૫ના રાત્રિના બારેક વાગ્યાની આસપાસ તેઓ ઘરના બધા સભ્યો પોતાના રૂમમાં સુઇ ગયેલ અને માતા વિજ્યાબેન તથા પિતા દરરોજ સવારે સાડા ચાર વાગ્યે શાપર આનંદી આશ્રમે સેવા પુજા માટે જતા હોય છે, જે ગઈકાલે પણ સવારે આનંદી આશ્રમે ઓસરીના દરવાજામાં તાળુ મારીને ગયા હતાં.

ફરિયાદીના પત્નીની સવારે પાંચેક વાગ્યે ઉંઘ ઉડતા તેમણે પતિને જગાડીને કહેલ કે, આપણો રૂમ બહારથી કોઈએ બંધ કરી દીધો છે. જેથી તેઓએ સામે રહેતા કાકા જામતભાઈ ભુવાને ફોન કરી આ બાબતે વાત કરતાં તેમણે બહાર નીકળી જોયું અને કહ્યું તમારી ઓસરીની બારી તૂટેલી છે જેથી ચોરી થયાની શંકા જતા ઓસરીની ચાવી પિતા પાસે હતી. કાકાનો દીકરો આશીષ માતા-પિતાને તેડી આવેલ અને ઓસરીનું તાળુ ખોલી બાદમાં તેઓના રૂમના દરવાજા ખોલતા બહાર આવેલ હતાં.

બાદમાં ઘરમાં જોતા ઓસરીની બારી તુટેલી અને મારા માતા-પિતાનો રૂમ ખુલ્લો હતો. જેમાં જોતા પતરાનો કબાટનો લોક તથા અંદરની તીજોરીની લોક તૂટેલો હતો. તીજોરીમાં રાખેલ રોકડ રૂ. ૨ લાખ અને જુના વારસાગત ચાંદીના રાણી સીક્કા જોવામાં આવેલ નહીં, જેથી કોઈ અજાણ્યા શખ્સો ઘરની ઓસરીની બારી તોડી રૂમના કબાટનું લોકર તોડી તેમા રાખેલ રોકડ રૂ.૨ લાખ અને તથા જુના ચાંદીના સીકા ચોરી કરી નાસી છૂટતાં ફરિયાદ નોંધાવી હતી.