સુરતમાં લૂંટારૂઓ હવસખોર બની ઘરમાં ઘૂસ્યા હતા. પહેલા ઘરમાં છરીની અણીએ લૂંટ ચલાવી પછી યુવતીને પીંખી દુષ્કર્મ આચર્યું હતું. આ બનાવ શહેરના પુણા વિસ્તારમાં બન્યો હતો. આ અંગે પુણા પોલીસને જાણ કરવામાં આવતા પોલીસનો કાફલો ઘટનાસ્થળે દોડી ગયો હતો અને તપાસ આદરી હતી. આ અંગે ઉચ્ચ અધિકારીઓ એસીપી અને ડીસીપી સહિતના પણ દોડી ગયા હતા અને તપાસ કરી હતી. ઉલ્લેખનીય છે કે, પોલીસે તપાસ કરતા એક સીસીટીવીમાં બે શકમંદ કેદ થઈ ગયા છે, જેના આધારે તપાસ હાથ ધરાઈ છે.

રાત્રિના સમયે ઘરમાં ઘૂસી બે શખ્સોએ ગુનાને અંજામ આપ્યો
પ્રાપ્ત વિગત મુજબ, પુણા વિસ્તારમાં એક મકાનમાં રાતે યુવતી ઘરે હાજર હતી. દરમિયાન બે અજાણ્યા ઈસમો ઘરમાં ઘૂસી યુવતીને બંધક બનાવી લીધી હતી અને ચપ્પુની અણીએ ઘરમાં લૂંટ ચલાવી હતી. એટલું જ નહીં પણ લૂંટ ચલાવ્યા બાદ ઘરમાં બંધક બનાવવામાં આવેલી યુવતી પર દુષ્કર્મ આચરવામાં આવ્યું હતું. ત્યારબાદ બંને ઈસમો ફરાર થઈ ગયા હતા. આ અંગે મહિલા દ્વારા પોલીસને જાણ કરવામાં આવી હતી. જેથી પુણા પોલીસ દ્વારા આ ઘટનાને ગંભીરતાથી લઈને તપાસ કરવામાં આવી છે.

પોલીસે સીસીટીવીના આધારે તપાસ હાથ ધરી
પોલીસ પાસેથી માહિતી મુજબ, બે શખસ દ્વારા લૂંટ અને દુષ્કર્મની ઘટનાને અંજામ આપવામાં આવ્યો હતો. ભોગ બનેલી યુવતીના જણાવ્યા પ્રમાણે, એક સિલ્વર બ્રેસલેટ અને 30000ની ચપ્પુની અણીએ લૂંટ કરી હતી. ત્યારબાદ દુષ્કર્મ આચરવામાં આવ્યું હતું. સ્થાનિક પોલીસ અને ક્રાઈમ બ્રાન્ચ બંને સાથે મળીને સીસીટીવી સહિતના આધારે તપાસ હાથ ધરવામાં આવી છે. આ સાથે જ આરોપીઓને ઝડપી પાડવા માટે ચક્રો ગતિમાન કરવામાં આવ્યા છે.

​​​​​​​ફરિયાદીની પણ પૂછપરછ હાથ ધરાઈ
લૂંટ સાથે દુષ્કર્મની ઘટના બનવાના પગલે પોલીસનો મોટો કાફલો ઘટનાસ્થળે દોડી ગયો હતો. આ સાથે જ ઉચ્ચ અધિકારીઓ સહિતનાએ ઘટનાસ્થળે તપાસ કરી હતી. આ સાથે જ ક્રાઈમ બ્રાન્ચના ડીસીપી પણ ઘટના સ્થળે દોડી ગયા હતા અને આ મામલે તપાસ હાથ ધરવામાં આવી રહી છે. અત્રે ઉલ્લેખનીય છે કે ફરિયાદી મહિલા પણ શંકાના દાયરામાં હોવાથી તેની પણ ઉલટ તપાસ કરવામાં આવી રહી છે. આ સાથે સીસીટીવી માં બે શંકાસ્પદ પણ કેદ થઈ ગયા છે.