ખોડીયાર કોલોનીમાં એસઓજી ત્રાટકી: 1.600 કિ.ગ્રામ ગાંજો કબ્જે: પાલનપુરના શખ્સની સંડોવણી ખુલી

જામનગરના ખોડીયાર કોલોની વિસ્તારમાં એક બાતમીના આધારે બે મહિલાને ગાંજાના જથ્થા સાથે અટકમાં લીધી હતી, તપાસ કરતા પાલનપુરના શખ્સનું નામ ખુલ્યુ હતું આથી ત્રણેયની સામે એનડીપીએસ એકટ મુજબ ફરીયાદ નોંધવામાં આવી હતી અને તપાસ લંબાવવામાં આવી છે.

જામનગર એસઓજીની ટુકડી પેટ્રોલીંગમાં હતી ત્યારે મળેલ હકીકતના આધારે ખોડીયાર કોલોનીમાં બે મહિલાઓને આંતરીને તેની પાસે રહેલ કપડાનો થેલો ચેક કરતા માદક પદાર્થ મળી આવ્યો હતો.

આથી મુળ પાલનપુરના માન સરોવર ફાટક પાસે ઝુપડપટ્ટીમાં રહેતા હંસાબેન કરણ વઢીયાર અને જામનગર દિગ્જામ સર્કલ પાસે બાવરીવાસમાં રહેતી શોભાબેન મનોજ બાવરીની અટકાયત કરી તેની પાસેથી વેચાણ અર્થે લાવેલ 1 કીલો 600 ગ્રામ ગાંજો મળી આવ્યો હતો. ગાંજા ઉપરાંત એક મોાઇલ અને થેલો મળી કુલ 26 હજારનો મુદામાલ જપ્ત કર્યો હતો, પુછપરછ દરમ્યાન બનાવસકાંઠા જીલ્લાના પાલનપુરના દિલીપ અરજણ કોળીનું નામ ખુલ્યુ હતું જેને ફરાર જાહેર કરવામાં આવ્યો છે આ ત્રણેયની સામે એસઓજીના પીએસઆઇ એલ.એમ. ઝેર દ્વારા ફરીયાદી બનીને સીટી-સી ડીવીઝનમાં એનડીપીએસ એકટ મુજબ ગુનો દાખલ કરવામાં આવ્યો છે.