દેશવાસીઓ ભજન સાથે શેર કરી વડાપ્રધાને ઓસમાણ મીરના કર્યા વખાણ, ૨ દિવસ પહેલા ગીતા રબારીનું રામ ભજન કર્યું હતું શેર 

View this post on Instagram

A post shared by Aajkaal (@aajkaaldaily)

ઓસ્માન મીર ગુજરાતના જાણીતા ગાયક છે અને તેમનો કંઠ સૌ કોઈને મંત્ર મુગ્ધ કરતો રહે છે. આ વખતે વડાપ્રધાન નરેન્દ્ર મોદી દ્વારા તેમની પ્રશંસા કરવામાં આવી છે. ઓસ્માન મીર અને તેમના પિતા તથા દાદા પણ સંગીતની દુનિયા સાથે સંકળાયેલા રહ્યા છે. અયોધ્યામાં નિર્માણ પામેલા ભવ્ય રામ મંદિરની પ્રાણ પ્રતિષ્ઠા ૨૨ જાન્યુઆરીએ કરવામાં આવશે ત્યારે સંગીતની દુનિયા સાથે સંકળાયેલી હસ્તીઓ પણ રામ ભક્તિમાં લીન થઈ છે. એક તરફ અંતિમ ઘડીને તૈયારીઓ ચાલી રહી છે તો બીજી તરફ ભગવાન રામની ભક્તિ અંગે વિવિધ કલાકૃતિઓ પણ સામે આવી રહી છે.

ઓસ્માન મીર માત્ર ગુજરાતી જ નહીં પરંતુ બોલિવૂડ ફિલ્મમાં પણ પોતાનો અવાજ આપી ચૂક્યા છે. તેમની ખ્યાતી દેશ-વિદેશમાં છે ત્યારે અયોધ્યામાં રામ મંદિરની પ્રાણ પ્રતિષ્ઠા પહેલા તેમણે ગાયેલું રામ ભજન પણ લોકોને ઘણું પસંદ પડી રહ્યું છે. આ ભજનને પસંદ કરનારા લોકોમાં આજે વડાપ્રધાન નરેન્દ્ર મોદીનો પણ સમાવેશ થયો છે. તેમણે ઓસમાણ મીરે ગાયેલા ભજનની પ્રશંસા કરીને લખ્યું છે કે, “અયોધ્યા નગરીમાં શ્રી રામજીના પધારવાને લઈને ઉમંગ અને ઉલ્લાસ છે. ઓસ્માન મીરજીએ આ મધુર રામ ભજન સાંભળીને તમને તેની દિવ્ય અનુભૂતિ થશે.”

ઓસમાણ મીરે આ ગીત ૮મી જાન્યુઆરીએ યુ-ટ્યુબ પર રજૂ કર્યું હતું જેને લાખો લોકો સાંભળી ચૂક્યા છે. હજારો લોકો તેમના ભજન અને કંઠની પ્રશંસા કરી રહ્યા છે જેમાં એક યુઝરે લખ્યું છે કે, તમારું રામ ભજન સાંભળીને મનભાવન અનુભૂતિ થઈ છે. આ પહેલા પણ વડાપ્રધાન મોદીએ કચ્છની કોયલથી જાણીતા ગીતા રબારીએ ગાયેલું ભજન શેર કરીને તેમના કંઠ અને ભજનની પ્રશંસા કરી હતી. આ સિવાય દેશના વિવિધ ગાયકો દ્વારા રામ ભક્તિમાં લીન થઈને ભજન ગાવામાં આવી રહ્યા છે તેમની કૃતિઓને પણ વડાપ્રધાન મોદી શેર કરી ચૂક્યા છે.

નોંધનીય છે કે, ૨૨ જાન્યુઆરીએ અયોધ્યામાં રામ મંદિરની પ્રાણ પ્રતિષ્ઠા કરવામાં આવશે. આ માટે માત્ર ભારત જ નહીં પરંતુ દુનિયાભરમાં વિશ્વ હિન્દુ પરિષદ દ્વારા વિવિધ કાર્યક્રમોનું આયોજન કરવામાં આવ્યું છે. જ્યારે ભારતમાં પણ લોકો ઘરે બેઠા આ કાર્યક્રમને નિહાળી શકે તે માટેનું આયોજન કરવામાં આવ્યું છે.