દુનિયાની સૌથી મોંઘી ઘડિયાળોની વાત કરીએ તો ગ્રાફ ડાયમંડ્સ હેલ્યુસિનેશનનું નામ આવે છે. સામાન્ય માણસ તેને ખરીદી શકતો નથી કારણ કે તેની કિંમત 458 કરોડ રૂપિયાથી વધુ છે. બીજા સ્થાને ગ્રાફ ડાયમંડ ધ ફેસિનેશન આવે છે, જે રૂ. 333 કરોડમાં વેચાય છે. આ ઘડિયાળો સ્પેશીયલ ઓર્ડર માટે બનાવવામાં આવે છે. પરંતુ આ દિવસોમાં એક અલગ ઘડિયાળની ચર્ચા છે. કારણ કે ખરીદદારે આ ઘડિયાળની માંગેલી કિંમત કરતાં 6 ગણી વધુ રકમ ચૂકવીને ખરીદી છે.

અહેવાલ મુજબ, તે સોનાની પોકેટ ઘડિયાળ હતી, જે ટાઇટેનિકમાં સવાર સૌથી ધનિક મુસાફર જોન જેકબ એસ્ટરે પહેરી હતી. તાજેતરમાં જ્યારે તેની હરાજી કરવામાં આવી ત્યારે તેની કિંમત 150,000 પાઉન્ડ એટલે કે અંદાજે 1.5 કરોડ રૂપિયા રાખવામાં આવી હતી. પરંતુ એક વ્યક્તિએ તેને 900,000 પાઉન્ડ ચૂકવીને ખરીદી છે. જો ભારતીય રૂપિયામાં તેની કિંમત જોઈએ તો તે 9.5 કરોડ રૂપિયા આવે છે. અગાઉ, ટાઇટેનિક જહાજમાંથી મળી આવેલા વાયોલિનની હરાજી કરવામાં આવી હતી, જેના માટે ખરીદનારએ 1.1 મિલિયન પાઉન્ડ ચૂકવવામાં આવ્યા હતા.

14 એપ્રિલ 1912ની રાત્રે જ્યારે ટાઈટેનિક જહાજ સાઉથમ્પટનથી ન્યૂયોર્ક જઈ રહ્યું હતું ત્યારે તે ઉત્તર એટલાન્ટિકમાં એક આઇસબર્ગ સાથે અથડાયું હતું અને સમુદ્રમાં ડૂબી ગયું હતું. આ સાથે જહાજમાં સવાર 1500થી વધુ લોકો પણ દરિયામાં ડૂબી ગયા હતા. બાદમાં જ્યારે આ જહાજના અવશેષોની શોધ કરવામાં આવી ત્યારે 280થી વધુ વસ્તુઓ બહાર કાઢવામાં આવી હતી જે યાદગાર બની ગઈ હતી. આની ધીમે ધીમે હરાજી કરવામાં આવી રહી છે. તે લોકોના દિલની એટલી નજીક છે કે તેઓ તેને મસમોટી કિંમતે ખરીદે છે.