સ્વપ્નનું ઘર બનાવવું હજુ વધુ મોંઘુ બનવાનું છે. સપ્ટેમ્બરમાં સિમેન્ટ પ્રતિ બેગ ₹7 મોંઘુ થયુ જ છે, હજુ ઓક્ટોબરમાં તેના ભાવમાં 20 સુધીનો વધારો થઈ શકે તેવી શક્યતા વ્યક્ત કરવામાં આવી છે. સિમેન્ટ કંપનીઓ આવતા મહિને ફરી ભાવ વધારવાનો પ્રયાસ કરી શકે છે. બ્રોકરેજ ફર્મ સેન્ટ્રમ બ્રોકિંગના અહેવાલ મુજબ, ઘણા બજારોમાં સિમેન્ટના ભાવ ઓક્ટોબરમાં પ્રતિ બેગ 5 થી 20 રૂપિયા સુધી વધી શકે છે. જોકે, આ વધારાની અવધિ માંગ અને ડીલરોની સંમતિ પર આધારિત રહેશે.

રિપોર્ટ મુજબ, દેશભરમાં સિમેન્ટનો સરેરાશ વેપાર ભાવ સપ્ટેમ્બરમાં પ્રતિ બેગ 7 વધીને પ્રતિ બેગ આશરે 356 સુધી પહોંચ્યો. જુલાઈ અને ઓગસ્ટમાં ભાવ યથાવત રહ્યા. સપ્ટેમ્બરમાં, વેપાર અને બિન-વેપાર બંને સેગમેન્ટમાં ભાવમાં વધારો થયો, બિન-વેપાર સેગમેન્ટમાં પ્રમાણમાં વધારે વધારો જોવા મળ્યો. જોકે, કંપનીઓ દ્વારા વધેલા બિલિંગ ભાવની સંપૂર્ણ અસર ગ્રાહકો સુધી પહોંચી ન હતી. કેટલાક બજારોમાં, ડીલરોએ ક્વાર્ટર-એન્ડ વેચાણ લક્ષ્યોને પૂર્ણ કરવા માટે જૂના ભાવે સિમેન્ટ વેચ્યું હતું. જો કે એક સમય એવો આવશે જ કે જેમાં આ ભાવ વધારો લોકોની કેડ પર આવશે.

દક્ષિણ ભારતમાં સૌથી વધુ વધારો જોવા મળ્યો

પ્રાદેશિક રીતે, સપ્ટેમ્બરમાં દક્ષિણ ભારતમાં સિમેન્ટના ભાવમાં પ્રતિ બેગ 11નો વધારો થયો. ત્યારબાદ પશ્ચિમ ભારતમાં પ્રતિ બેગ 9નો વધારો થયો. મધ્ય, પૂર્વ અને ઉત્તર ભારતમાં ભાવમાં આશરે 5નો વધારો થયો.સેન્ટ્રમ બ્રોકિંગના મતે, કંપનીઓ ઓક્ટોબરમાં ફરીથી ભાવ વધારવાનો પ્રયાસ કરી શકે છે. જોકે, તેમની સફળતા બાંધકામ પ્રવૃત્તિ અને સિમેન્ટની માંગ પર આધાર રાખશે. જુલાઈ-ઓગસ્ટમાં ઘણા બજારોમાં માંગ મર્યાદિત હતી, જ્યારે સપ્ટેમ્બરમાં કેટલાક પ્રદેશોમાં પ્રવૃત્તિમાં સુધારો થયો. વરસાદને કારણે પ્રાદેશિક માંગ પર પણ અસર પડી. ભારે વરસાદવાળા વિસ્તારોમાં બાંધકામ પ્રવૃત્તિ પર અસર પડી, જ્યારે ઓછા વરસાદવાળા વિસ્તારોમાં કામગીરીમાં સુધારો થયો. વધુમાં, તાજેતરના અઠવાડિયામાં ઇંધણના ભાવમાં તીવ્ર વધારો થયો છે. આ કંપનીઓ માટે ખર્ચમાં વધારો કરી શકે છે અને ભાવ વધારવા માટે દબાણ બનાવી શકે છે. રિપોર્ટ અનુસાર, ડીલરો ઓક્ટોબરમાં વધેલા ભાવોને સ્વીકારે છે કે નહીં અને બાંધકામ ક્ષેત્રમાંથી માંગ કેટલી મજબૂત રહે છે તે સિમેન્ટના ભાવની ભવિષ્યની દિશા નક્કી કરવાના મુખ્ય પરિબળો હશે.