બાબરા : ગુજરાત પ્રદેશ ભારતીય જનતા પાર્ટીના બક્ષીપંચ મોરચાના ઉપાધ્યક્ષ પદે બાબરાના વરિષ્ઠ ભાજપ આગેવાન અને શહેરના હરહંમેશ માર્ગદર્શક ભુપેન્દ્રભાઈ બસીયાની નિમણૂક થતાં અનમોલ પાર્ક સોસાયટીના રહીશો દ્વારા તેમનું ઉષ્માભેર અને ભાવભર્યું સન્માન કરવામાં આવ્યું હતું.
ગુજરાત પ્રદેશ ભાજપ દ્વારા ભુપેન્દ્રભાઈ બસીયાને બક્ષીપંચ મોરચાના ઉપાધ્યક્ષ તરીકે મહત્વપૂર્ણ જવાબદારી સોંપવામાં આવતા બાબરા શહેર તથા આસપાસના કાર્યકરો અને શુભેચ્છકોમાં આનંદની લાગણી જોવા મળી રહી છે. આ નિમણૂક બદલ અનમોલ પાર્ક સોસાયટીના રહીશો દ્વારા વિશેષ સન્માન સમારોહનું આયોજન કરવામાં આવ્યું હતું.
સન્માન સમારોહ દરમિયાન સોસાયટીના રહીશોએ ભુપેન્દ્રભાઈ બસીયાનું પરંપરાગત રીતે તલવાર અર્પણ કરી સન્માન કર્યું હતું. ઉપસ્થિત રહીશોએ તેમને નવી જવાબદારી બદલ અભિનંદન તથા શુભેચ્છાઓ પાઠવી હતી. સાથે જ તેઓ સંગઠન, સમાજ અને જનસેવાના ક્ષેત્રે નવી જવાબદારીને સફળતાપૂર્વક નિભાવતા વધુ લોકોપયોગી કામગીરી કરે તેવી શુભકામનાઓ વ્યક્ત કરવામાં આવી હતી.
આ પ્રસંગે ભુપેન્દ્રભાઈ બસીયાએ સોસાયટીના રહીશો દ્વારા કરવામાં આવેલા સન્માન બદલ સૌનો આભાર વ્યક્ત કર્યો હતો. તેમણે સંગઠન દ્વારા સોંપવામાં આવેલી જવાબદારીને નિષ્ઠાપૂર્વક નિભાવવાની તથા સમાજ અને કાર્યકરો સાથે સતત જોડાઈને કામગીરી કરવાની લાગણી વ્યક્ત કરી હતી.
સમારોહમાં અનમોલ પાર્ક સોસાયટીના મોટી સંખ્યામાં રહીશો ઉપસ્થિત રહ્યા હતા. સન્માન દરમિયાન રહીશોમાં ઉત્સાહ અને આનંદનો માહોલ જોવા મળ્યો હતો. ભુપેન્દ્રભાઈ બસીયાની પ્રદેશ ભાજપ બક્ષીપંચ મોરચાના ઉપાધ્યક્ષ તરીકે થયેલી નિમણૂકને લઈને ઉપસ્થિત સૌએ તેમને શુભેચ્છાઓ પાઠવી હતી.