વાપીના છરવાડા વિસ્તારમાં પતિએ જાહેરમાં પત્નીનું છરી વડે ગળું કાપીને નિર્દયતાથી હત્યા કરી દીધી હતી. સાંઈ સંસ્કાર બિલ્ડિંગની બહાર બનેલી આ ઘટનાને પગલે સમગ્ર વિસ્તારમાં ભારે અરેરાટી ફેલાઈ ગઈ હતી. ઘટનાની ગંભીરતાને ધ્યાનમાં રાખીને ડુંગરા પોલીસ સ્ટેશનની ટીમ તાત્કાલિક ઘટનાસ્થળે દોડી આવી હતી અને આરોપી પતિ પરેશ કંટારિયાની ધરપકડ કરી લીધી હતી.   

પ્રાપ્ત માહિતી અનુસાર, છરવાડા વિસ્તારમાં આવેલી સાંઈ સંસ્કાર બિલ્ડિંગમાં રહેતી 32 વર્ષીય સીમાના લગ્ન પરેશ કંટારિયા સાથે થયા હતા. આ દાંપત્ય જીવન દરમિયાન તેમને એક સંતાન પણ છે. જોકે, પતિ-પત્ની વચ્ચે અવારનવાર નાના-મોટા ઝઘડા અને મનદુઃખ રહેતું હોવાને કારણે સીમા છેલ્લા ચાર વર્ષથી પોતાના પુત્ર સાથે અલગ રહેતી હતી. આત્મનિર્ભર બનવા માટે સીમા પોતાનું બ્યુટી પાર્લર ચલાવીને ગુજરાન ચલાવતી હતી.   

નિર્ધારિત સમયે સીમા પોતાના ઘરેથી બ્યુટી પાર્લર જવા માટે નીકળી હતી. જ્યારે તે બિલ્ડિંગની બહારના જાહેર રસ્તા પરથી પસાર થઈ રહી હતી, ત્યારે અચાનક જ પરેશ કંટારિયા તેની પાસે ધસી આવ્યો હતો. સીમા કઈ સમજે કે બચાવ માટે બૂમો પાડે તે પહેલાં જ પરેશે તેના પર છરી વડે ગળાના ભાગે જીવલેણ હુમલો કરી દીધો હતો. ગળા પર ગંભીર ઈજા થવાને કારણે સીમાનું લોહીથી લથપથ હાલતમાં ઘટનાસ્થળે જ કરૂણ મોત નીપજ્યું હતું.   

બિલ્ડિંગની બહાર જાહેર રસ્તા પર લોહીના ખાબોચિયામાં યુવતીની લાશ પડેલી જોઈને આસપાસના રહીશો અને રાહદારીઓ મોટી સંખ્યામાં એકઠા થઈ ગયા હતા. આ બનાવની જાણ થતાં જ સ્થાનિક રહીશ દ્વારા પોલીસને જાણ કરવામાં આવી હતી. ડુંગરા પોલીસની ટીમ તાત્કાલિક સ્થળ પર પહોંચી ગઈ હતી અને લોકટોળા વચ્ચેથી જ આરોપી પરેશ કંટારિયાને ઝડપી લીધો હતો. પોલીસે સ્થળ પર પંચનામું કરી રહીશો તથા પ્રત્યક્ષદર્શીઓના નિવેદનો નોંધવાની કાગળની કાર્યવાહી હાથ ધરી હતી.   

પોલીસ તપાસ દરમિયાન એક ચોંકાવનારી વિગત સામે આવી છે કે અગાઉ પણ આ જ આરોપી પરેશે સીમા પર છરી વડે જીવલેણ હુમલો કર્યો હતો. તે સમયે આ બનાવ અંગે ગુનો નોંધાયા બાદ પરેશ જેલની હવા પણ ખાધી આવ્યો હતો. જેલમાંથી બહાર આવ્યા બાદ પણ તેની માનસિકતામાં સુધારો થયો ન હતો અને તેણે ફરીથી પત્નીની ઘાતકી હત્યા કરી નાખી છે. હાલ ડુંગરા પોલીસે આરોપી વિરુદ્ધ કલમો ઉમેરીને કાયદેસરની સખત કાર્યવાહી શરૂ કરી છે.