ખાલી ખમ્મ ઘી ડેમમાં નવા નીરની આવક : ખંભાળિયાના પાણી પ્રશ્ને મોટી રાહત

પૂનમબેન માડમ, જીતેન્દ્ર કણઝારીયા તેમજ મુળુભાઇ બેરાની રજુઆતોને સફળતાઆજકાલ પ્રતિનિધિ-ખંભાળીયા

ખંભાળિયા અને આસપાસના વિસ્તારો માટે પીવાના પાણીની સમસ્યા ઉકેલવા તરફ એક મોટો અને મહત્વપૂર્ણ વળાંક આવ્યો છે. લાંબા સમયથી ખાલી ખમ રહેલા ઘી ડેમમાં સૌની યોજના અંતર્ગત નવા નીરની આવક થતાં જળસપાટીમાં સાડા ત્રણ ફૂટનો વધારો નોંધાયો છે, જેનાથી સ્થાનિક રહીશોને પીવાના પાણીના પ્રશ્ને ભારે રાહત મળી છે.

મળતી વિગતો અનુસાર, સૌની યોજના હેઠળ દરરોજ આશરે એક કરોડ લીટર નર્મદાનું પાણી ઘી ડેમમાં પહોંચાડવામાં આવી રહ્યું છે. આ નવા જળસંગ્રહના કારણે ખંભાળિયા શહેર અને ગ્રામ્ય વિસ્તારોને આગામી ત્રણ મહિનાથી પણ વધુ સમય સુધી પીવાનું પાણી સરળતાથી મળી રહે તેવી ધારણા વ્યક્ત કરવામાં આવી રહી છે.

આ મહત્વપૂર્ણ કામગીરી માટે લોકસભા સાંસદ પૂનમબેન માડમ, રાજ્યસભા સાંસદ જીતેન્દ્ર કણજારીયા અને ધારાસભ્ય મુળુભાઈ બેરા દ્વારા સરકાર સમક્ષ સતત રજૂઆતો કરવામાં આવી હતી, જેના ફળસ્વરૂપે આ સફળતા મળી છે.