મુખ્ય ચૂંટણી કમિશનર સામેના વિરોધનો રેલો પહોંચ્યો જામનગર: કોંગીજનોના ધરણા

લાલબંગલા સર્કલ ખાતે શહેર કોંગ્રેસ અને કલેકટર કચેરી ખાતે જિલ્લા કોંગ્રેસ દ્વારા જ્ઞાનેશકુમાર સામે કરાયો ઉગ્ર વિરોધ: બન્ને સ્થળેથી અંદાજે પ૦ કોંગીજનોની પોલીસે કરી અટક

ભારતના ચુંટણી કમિશનર જ્ઞાનેશકુમાર સામે દેશભરમાં કોંગ્રેસ અને સાથી પક્ષો દ્વારા વિરોધ કરવામાં આવી રહ્યો છે, ગુજરાતમાં પણ ઠેકઠેકાણે દેખાવો થઇ રહ્યા છે ત્યારે આખરે આ વિરોધનો રેલો જામનગર પહોંચ્યો છે અને આજે શહેર-જિલ્લા કોંગી દ્વારા અલગ અલગ સ્થળે ધરણા, સુત્રોચ્ચાર કરીને વિરોધ કરવામાં આવ્યો હતો. પોલીસે બન્ને સ્થળેથી પ૦ જેટલા કોંગીજનોની અટક કરી હતી. 


ગઇકાલે જિલ્લા કોંગ્રેસ સમિતિ દ્વારા વિરોધના કાર્યક્રમની જાહેરાત કરવામાં આવી હતી ત્યારબાદ શહેર કોંગીએ પણ વિરોધનો કાર્યક્રમ જાહેર કર્યો હતો તે અનુસાર અહીંના લાલબંગલા સર્કલ ખાતે શહેર કોંગી સંગઠન પાંખ તથા નગરસેવકો અને આગેવાનો દ્વારા ધરણા કરવામાં આવ્યા હતા અને મુખ્ય ચુંટણી કમિશનર જ્ઞાનેશકુમારનું રાજીનામું માંગવામાં આવ્યું હતું. 

પોલીસ દ્વારા લાલબંગલા સર્કલે ધરણાનો કાર્યક્રમ અટકાવ્યો હતો અને શહેર કોંગ્રી પ્રમુખ દિગુભા જાડેજા, પ્રદેશ કોંગે્રસના બિપેન્દ્રસિંહ જાડેજા, કોંગી નગરસેવિકા સહારા મકવાણા સહિતના આગેવાનો કાર્યકરો સહિત રપ જેટલાની અટકાયત કરવામાં આવી હતી. બીજી તરફ સ‚સેકશન રોડ ઉપર સેવાસદન સામે જિલ્લા કોંગી દ્વારા પણ મુખ્ય ચુંટણી કમિશનરના રાજીનામાની માંગણી સાથે ધરણા કરવામાં આવ્યા હતા અને ત્યાં પોલીસે જિલ્લા કોંગી પ્રમુખ મનોજ કથીરીયા ઉપરાંત જે.પી.મારવીયા, તાલુકા કોંગી પ્રમુખ ઇકબાલભાઇ ઉપરાંત ગોવિંદભાઇ ચાવડા, સચીનભાઇ ચોટાઇ, લાલપુર તાલુકા કોંગી પ્રમુખ મહાવીરસિંહ, કાલાવડ તાલુકા કોંગી પ્રમુખ દિપકભાઇ સહિત આગેવાનો મળી રપ જેટલાની અટકાયત કરવામાં આવી હતી. બન્ને સ્થળેથી કોંગી આગેવાનોને પોલીસ વેનમાં બેસાડીને લઇ જવામાં આવ્યા હતા. 

આમ દેશના મુખ્ય ચુંટણી કમિશનર જ્ઞાનેશકુમાર સામે વિરોધનો વંટોળ દેશભરમાં ઉઠયો છે તેની અસર જામનગરમાં પણ પહોંચી છે. આગામી દિવસોમાં કદાચ વિરોધના વધુ કાર્યક્રમો કોંગી દ્વારા આપવામાં આવી શકે છે.