ખંઢેરા પાસે બાઇક પીલોરમાં અથડાતા ચાલક યુવાનનું મોત

કાલાવડના નાગપુર ગામથી ખંઢેરા ગામ તરફ વણાંકમાં ચાલકે મોટરસાયકલ પરથી કાબુ ગુમાવતા વાડીના ગેઇટના પીલોર સાથે બાઇક અથડાતા ગંભીર ઇજા સબબ યુવાનનું મૃત્યુ નીપજયુ હતું, જયારે અન્ય એક યુવાનને ઇજા પહોચી હતી.
મુળ એમપીના મુઝફરપુરના પતારી ગામના વતની અને હાલ કાલાવડ ગોલણીયા ગામ ફુલઝર ડેમ પાસે રહેતા અને માછીમારીનો ધંધો કરતા મુકેશ ફુલકેશરભાઇ માજી (ઉ.વ.૨૮) તથા દેવેન્દ્ર વશિષ્ટભાઇ સહની (ઉ.વ.૪૦) આ બંને મોટરસાયકલ નં. જીજે૩એલએલ-૬૦૮૭ લઇને તા. ૧૭ના બપોરના પાણા ચાર વાગ્યાના સુમારે નાગપુરથી ભરતપુર ડેમ ખાતે જતા હતા.
દેવેન્દ્રભાઇ બાઇક ચલાવતા હતા અને જાહેર કરનાર પાછળ બેઠા હતા, દરમ્યાન નાગપુરથી ખંઢેરા તરફના વણાંક પાસે પહોચતા ચાલકે મોટરસાયકલ પરથી કાબુ ગુમાવ્યો હતો અને ગોપાલભાઇની વાડીના લોખંડના ગેઇટના પીલોર સાથે બાઇક અથડાતા દેવેન્દ્રભાઇને માથા અને શરીરના ભાગે ગંભીર ઇજા થતા તેમનું સારવારમાં લઇ જતા મૃત્યુ નિપજયુ હતું જયારે મુકેશભાઇને શરીરે સામાન્ય ઇજા પહોચી હતી.
આ બનાવ અંગે મુકેશભાઇ માજી દ્વારા ગઇકાલે કાલાવડ ગ્રામ્ય પોલીસમાં જાણ કરવામાં આવી હતી જેના આધારે ગ્રામ્ય પોલીસ સ્ટેશન દ્વારા આગળની કાર્યવાહી હાથ ધરી હતી અને બનાવ સબંધે તપાસ લંબાવી હતી.