ગરબી જોવા ગયા ત્યારે વાહન બાબતે ડખ્ખો થયો : બે શખ્સ સામે રાવ

સિકકાની ટીપીએસ કોલોનીમાં મુંગણી ગામનો યુવાન ગરબી જોવા ગયો હતો અને પરત ફરતો હતો ત્યારે બે શખ્સોએ રસ્તામાં આંતરીને અમારા પર બોલેરો ચડાવ્યો તેમ કહી જાતી પ્રત્યે હડધુત કરીને ફડાકા ઝીંકી દેતા મામલો પોલીસમાં પહોચ્યો છે. આ બે શખ્સો સામે એટ્રોસીટી સહિતની કલમ મુજબ ફરીયાદ લેવામાં આવી છે.

જામનગર તાલુકાના મુંગણી ગામમાં રહેતા ડ્રાઇવીંગ કરતા ભરત નારણભાઇ પરમાર (ઉ.વ.24) નામના યુવાને સિકકા પોલીસમાં મુંગણી ગામના ક્રિપાલસિંહ બનેસંગ કંચવા અને સિકકાના પ્રેમદીસિંહ બ્રિજરાજસિંહ જાડેજા આ બંનેની વિરુઘ્ધ  એટ્રોસીટી સહિતની કલમ મુજબ ફરીયાદ કરી હતી.

ફરીયાદી ભરતભાઇ ગઇકાલે ટીપીએસ કોલોનીમાં ગરબી જોવા માટે ગયા હતા ત્યારે કોલોનીના ગેઇટ પાસે આરોપી ક્રિપાલસિંહ તેની નંબર વીનાની ફોરવ્હીલ ફરીયાદીની બાજુમાથી લઇને નિકળેલ હોય તનો ખાર રાખી ફરીયાદી ગરબી જોઇને પરત આવતા હતા ત્યારે આરોપી ફોરવ્હીલ લઇને આવી ટીપીએસ કોલોની હોસ્પીટલ સામેના રોડ પર ફરીયાદીના બોલેરોને ઓવરટેક કરી ત્યા આગળ પોતાની ગાડી ઉભી રાખીને જાતી પ્રત્યે ફરીયાદીને હડધુત કરી હમણા થોડીવાર પહેલા ટીપીએસ કોલોનીના ગેઇટ પાસે અમારા પર તારો બોલેરો ચડાવેલ હતો તેમ કહીને ઝાપટો મારી હતી.

દરમ્યાન ક્રિપાલસિંહના સબંધી પ્રેમદીસિંહ જાડેજા નંબર વીનાની એકસેસ બાઇક લઇને આવ્યો હતો અને બંનેએ ફરીયાદીને ઝાપટો મારીને હવે બીજીવાર અમારી પર બોલેરો ચડાવ્યો છે તો જીવતો  રહેવા નહીં દઉ તેમ કહી અપશબ્દો બોલી જાતી પ્રત્યે હડધુત કરીને એકબીજાને મદદગારી કરી હતી. આ ફરીયાદના આધારે ડીવાયએસપી દ્વારા તપાસ ચલાવવામાં આવી રહી છે.