વળતર પેટે ભોગ બનનારને બે લાખ રુપીયા ચુકવવા પોક્સો અદાલતનો હુકમ
જામનગર તાલુકાના સિક્કા પોલીસ સ્ટેશનમાં ત્રણ વર્ષ પહેલા નોંધાયેલ સગીરા સાથે ના દુષ્કર્મ અંગે ની ફરિયાદ ના કેસ માં અદાલતે આરોપી ને ૧૦ વર્ષ ની જેલ સજા નો હુકમ કર્યો છે.
વર્ષ ૨૦૨૨ માં આરોપી ફીરોજ ગનીભાઈ ચમડીયા એ ફરીયાદી ની સગીર વયની ભોગબનનાર દીકરીને ધાકધમકી આપી તથા સગીર વયની અવસ્થાનો લાભ લઈ ભોગબનનાર સાથે તેની મરજી વિરૂધ્ધ શરીર સંબંધ બાંધી, દુષ્કર્મ ગુજારી, ભોગબનનાર નું શારીરિક શોષણ કરી અને ભોગબનનાર આ બાબતે કોઈને વાત કરશે તો તેના નાના ભાઈને જાનથી મારી નાખવાની ધમકી આપી હતી અને ત્યાર પછી પણ અવારનવાર ભોગબનનાર સાથે શરીર સંબંધ બાંધવા અંગે ફરીયાદી ઘ્વારા સિકકા પો.સ્ટે.માં ફરીયાદ નોંધાવાઇ હતી.
જે ફરીયાદના આધારે તપાસ કરનાર પોલીસ અધિકારી ધ્વારા ગુનાની તપાસ કરી આરોપી વિરૂધ્ધ દુષ્કર્મ તથા પોકસો એકટ ની કલમ મુજબ નો ગુનો નોંધી પોલીસે આરોપીની ધરપકડ કરી હતી.
આ અંગેનો કેસ જામનગરની સ્પે. પોકસો અદાલતમાં ચાલી જતા ભોગબનનાર, ફરીયાદી, મેડીકલ ઓફીસરની જુબાની તથા સરકાર પક્ષે રજુ કરવામાં આવેલ ૪૨ જેટલા દસ્તાવેજી પુરાવાઓ, તેમજ ૧૨ જેટલા સાહેદોની સોગંદ ઉપરની જુબાની તથા સરકાર પક્ષે મુખ્ય જીલ્લા સરકારી વકીલ જમન કે. ભંડેરી એ અદાલત સમક્ષ ધારદાર દલીલ કરતાં જણાવેલ કે, આરોપી સામે સગીર વયની બાળા સાથે બદકામ, તેમજ દુષ્કર્મ કરવા અંગેનો ગુનો છે, તેમજ સમાજમાં દિન-પ્રતિદિન આ પ્રકારના વધતા જતાં ગુનાઓને કારણે સગીર વયની બાળાઓ ઉપર વિપરીત અસર પડે છે. આરોપી સામે પ્રથમદર્શનીય કેસ હોય આથી આવા સંજોગોમાં સગીર બાળા ઉપર થયેલ દુષ્કર્મના ગુનાની ગંભીરતાને ઘ્યાને લઈ સમાજમાં દાખલો બેસે તેથી આરોપીને મહતમ સજા અને દંડનો હુકમ કરવા રજુઆત કરેલ હતી.
તમામ દલીલો સંભળાયા પછી જામનગરની સ્પે. પોકસો અદાલતના ન્યાયાધીશ વી.પી. અગ્રવાલ એ આરોપી ને તકસીરવાન ઠરાવી ૧૦ વર્ષ.ની સખત કેદની સજા તથા રૂા. ૧૦,૦૦૦ ના દંડ.નો હુકમ ફરમાવેલ છે તથા ભોગબનનારને વળતર પેટે રૂા. ૨,૦૦,૦૦૦ ચુકવવાનો હુકમ કર્યો છે. આ કેસમાં સરકાર પક્ષે જીલ્લા સરકારી વકીલ જમન કે. ભંડેરી રોકાયા હતા.
