પહેલા તમે મોકલો પછી અમે મોકલશું એ મામલે થઇ માથાકુટ : બેને ઇજા

જામજોધપુર તાલુકાના ટાંકાજણ નેશમાં બે વેવાઈઓ વચ્ચે ઝઘડો થયો હતો, અને એક વૃઘ્ધ તેમના બહેન પર ચાર સભ્યોએ હુમલો કરી દીધાની ફરિયાદ જામજોધપુર પોલીસ મથકમાં નોંધાવાઇ છે.
મૂળ રાજકોટ જિલ્લાના જામકંડોરણા ગામના વતની અને માલધારીનો વ્યવસાય કરતા જસરણભાઈ ભારમલભાઈ માવલીયા નામના ૬૫ વર્ષના બુઝુર્ગ કે જેઓએ પોતાના ઉપર તેમજ પોતાના બહેન પર લાકડીઓ વડે આડેધડ હુમલો કરી ઇજા પહોંચાડવા અંગે જામજોધપુર તાલુકાના ટાંકાજળ નેશના વતની સિધ્ધરાજ ગગમલ સુમાત, વાઘરાજ ગગમલ, નાગાજણ ગગમલ તેમજ લાખાભાઈ ગગમલ સામે ફરિયાદ નોંધાવી છે.
ફરીયાદી જસરણભાઇ બનાવના આગલા દિવસે પોતાના દિકરા તેજસુરની પત્નીને તેડવા માટે પોતાની સગી બેન વાલીના ઘરે ગયા હતા અને બનાવના દિવસે આરોપીઓ જે ફરીયાદીના ભાઇના વેવાઇના દિકરાઓ થતા હોય તેઓ આવીને ફરીયાદીને તમો પહેલા તમારા ભાઇની દીકરીને મોકલો પછી અમે મોકલશુ તેમ કહેતા ફરીયાદીએ આરોપીઓને પોતાના ભત્રીજાઓના લગ્ન બાદ અમે અમારી દીકરીને મોકલશું તેમ કહેતા આરોપીઓ ઉશ્કેરાઇ ગયા હતા.
અપશબ્દો બોલી કુંડલીવાળી લાકડીનો એક ઘા ફરીયાદીને માથમાં મારી દીધો હતો, શરીરે આડેધડ લાકડીઓ ઝીંકી હતી, ઢીકાપાટુનો માર માર્યો હતો આ વખતે વાલીબેન વચ્ચે છોડાવવા આવતા તેને પણ લાકડી ઝીંકી દેવામાં આવી હતી.