રાજકોટ, લોધિકા અને પડધરી તાલુકાના ૧૮૦ ગામોનું વિશાળ કાર્યક્ષેત્ર ધરાવતા સૌરાષ્ટ્રના સૌથી મોટા એવા રાજકોટના બેડી માર્કેટ યાર્ડમાં આજે સતત બીજા દિવસે કમિશન એજન્ટોએ હડતાલ પાડતાં હરરાજી સહિતના કામકાજ ઠપ્પ રહ્યા હતા. રાજકોટ યાર્ડમાં રૂ.૧૭.૧૯ કરોડનું ફુલેકુ ફેરવીને ફરાર થયેલા જે.કે.ટ્રેડિંગવાળા ઢોલરીયા બંધુ જ્યાં ન પકડાય તેમજ કમિશન એજન્ટો તેમજ વેપારીઓને તેમના પૈસા પરત ન મળે ત્યાં સુધી યાર્ડમાં હરરાજી નહીં કરવાનું એલાન અપાતા વેપાર ધંધા ઠપ્પ થઇ ગયા છે.

પોલીસ કમિશનરને આવેદનપત્ર પાઠવી રજુઆત કરવામાં આવી

દરમિયાન આ અંગે રાજકોટ માર્કેટ યાર્ડ કમિશન એજન્ટ્સ એસોસિએશનના વર્તુળોએ જણાવ્યું હતું કે કમિશન એજન્ટોને તેમના નાણાં પરત ન મળે ત્યાં સુધી હરરાજી બંધ રહેશે. કમિશન એજન્ટોને સુડી વચ્ચે સોપારી જેવી સ્થિતિ થઇ છે કમિશન એજન્ટો નથી તો જણસીઓ વેંચનાર ખેડુતોને જવાબ આપી શકતા કે નથી તો માલ ખરીદનાર વેપારીઓને જવાબ આપી શકતા. ટુંકી મૂડીથી ઓછી સગવડતાએ ધંધો કરતા કમિશન એજન્ટોની હાલત તો ભારે કફોડી થઇ ગઇ છે. દરમિયાન ગઇકાલે ૧૫૦ જેટલા કમિશન એજન્ટો-વેપારીઓ દ્વારા આ અંગે રાજકોટ શહેર પોલીસ કમિશનરને આવેદનપત્ર પાઠવી રજુઆત કરવામાં આવી હતી.

પદાધિકારીઓએ પોલીસને રજુઆત કરી છે: બોઘરા

રાજકોટ માર્કેટ યાર્ડના ચેરમેન જયેશભાઇ બોઘરાએ જણાવ્યું હતું કે, યાર્ડના અનેક કમિશન એજન્ટ્સના પૈસા ફસાયા હોય આ મામલે તેમણે યાર્ડના પદાધિકારી હોવાની રૂએ રાજકોટ શહેર પોલીસ કમિશનરને રજુઆત કરી છે કે કમિશન એજન્ટ્સના પૈસા બાકી રાખી ભૂગર્ભમાં ઉતરી ગયેલાઓ તાત્કાલિક અસરથી પકડી પાડવામાં આવે.