ગુજરાતમાં કોરોના વાયરસના કેસોમાં સતત અને ચિંતાજનક ઉછાળો જોવા મળી રહ્યો છે. આજે રાજ્યમાં કોરોનાના નવા 235 કેસ નોંધાયા છે, જેણે આરોગ્ય તંત્રની ચિંતામાં અનેકગણો વધારો કર્યો છે. આ સાથે જ રાજ્યમાં કોરોનાના કુલ એક્ટિવ કેસની સંખ્યા 1109 પર પહોંચી ગઈ છે, જે છેલ્લા ઘણા સમયમાં સૌથી વધુ છે.

પ્રાપ્ત માહિતી અનુસાર હાલ 1076 દર્દીઓ હોમ આઈસોલેશનમાં રહીને સારવાર લઈ રહ્યા છે, જ્યારે 33 દર્દીઓને હોસ્પિટલમાં દાખલ કરવામાં આવ્યા છે. હોસ્પિટલમાં દાખલ દર્દીઓની સંખ્યામાં પણ ક્રમશઃ વધારો જોવા મળી રહ્યો છે, જે દર્શાવે છે કે વાયરસ વધુ પ્રભાવશાળી બની રહ્યો છે. જોકે, રાહતની વાત એ છે કે આજે 106 લોકો કોરોનામુક્ત થઈને ડિસ્ચાર્જ થયા છે.

​​​​​​​

રાજ્ય સરકાર અને આરોગ્ય વિભાગ દ્વારા પરિસ્થિતિને નિયંત્રણમાં લેવા માટે યુદ્ધના ધોરણે કામગીરી શરૂ કરવામાં આવી છે. લોકોને કોવિડ-19 ના નિયમોનું સખતપણે પાલન કરવા, જેમાં માસ્ક પહેરવું, સામાજિક અંતર જાળવવું અને ભીડવાળી જગ્યાઓ ટાળવી જેવી બાબતોનો સમાવેશ થાય છે, તે માટે ખાસ અપીલ કરવામાં આવી રહી છે. હોસ્પિટલોને પણ વધતા દર્દીઓની સંખ્યાને પહોંચી વળવા માટે પૂરતી વ્યવસ્થા જાળવવા અને સજ્જ રહેવા સૂચનાઓ આપવામાં આવી છે. આગામી દિવસોમાં આંકડાઓ પર સઘન નજર રાખવામાં આવશે અને જરૂર પડ્યે વધુ કડક પગલાં લેવામાં આવી શકે છે.