રાજકોટમાં અસહ્ય બફારો અને આકરી ગરમીને લઈને લોકો ત્રાહિમામ થયા છે. જોકે, બપોર બાદ સાંજના સમયે અચાનક વાતાવરણ પલટાયું હતું અને આકાશમાં કાળા ડિબાંગ વાદળો છવાયા હતા. બાદમાં તોફાની પવન ફૂંકાતા ધૂળની ડમરી ઉડી હતી. જોકે જોતજોતામાં જ વીજળીના કડાકા ભડાકા સાથે ધોધમાર વરસાદ શરૂ થયો છે. શહેરના વિવિધ વિસ્તારોમાં તોફાની પવન ફૂંકાઈ રહ્યો છે. ગોંડલ ચોકડી બાજુ વીજળીના કડાકા ભડાકા સાથે ધોધમાર વરસાદ પડી રહ્યો છે. જ્યારે મોરબી રોડ બાજુ આકાશ સાફ જોવા મળી રહ્યું છે. કોઠારિયા વિસ્તારમાં ગાજવીજ સાથે ધોધમાર વરસાદ પડી રહ્યો છે.

રસ્તાઓ પર પાણી ભરાયા 

શહેરના 150 ફૂટ રિંગ રોડ, ગોંડલ ચોકડી સહિતના વિસ્તારોમાં વીજળીના કડાકા ભડાકા સાથે વરસાદ તૂટી પડ્યો છે. ભારે વરસાદથી રસ્તાઓ પર વરસાદી પાણી ફરી વળ્યા છે. વરસાદને કારણે વાતાવરણમાં ઠંડક પ્રસરી ગઈ છે અને લોકોએ અસહ્ય બફારામાંથી રાહત મેળવી છે. ​​​​​​​​​​​​​​

લોકો ન્હાવા નીકળ્યા

બે દિવસથી અસહ્ય બફારા અને ગરમીથી પરસેવે રેબઝેબ થયેલા લોકો વરસાદમાં ન્વાહા માટે ઘરની બહાર નિકળી ગયા છે. જ્યારે સોસાયટીઓમાં બાળકો પણ શેરીમાં વરસાદની મજા માણી રહ્યા છે. 

વીજળીના કડાકા ભડાકા અને ભારે પવન સાથે વરસાદ પડ્યો

ગોંડલ ઉપરાંત કોટડા સાંગાણી, શાપર-વેરાવળ સહિતના વિસ્તારોમાં પણ ધોધમાર વરસાદ પડ્યો છે. સતત 15 દિવસથી કમોસમી વરસાદને લઈને ખેડૂતો ચિંતાતુર બન્યા છે.
બાગાયતી ઉપરાંત ઉનાળુ તલ ,મગ સહિતના પાકને નુકસાન થશે. રાજકોટ જિલ્લામાં સૌથી વધુ ગોંડલ અને આસપાસના ગ્રામ્ય વિસ્તારમાં વરસાદ પડ્યો છે. બે દિવસ પહેલા પણ એક થી દોઢ ઇંચ જેટલો વરસાદ પડ્યો હતો..