ધ્રાંગધ્રા તાલુકા પોલીસે નારીચાણા ગામની સીમમાં દરોડો પાડી ગેરકાયદે ચાલતો રેતીનો વોશપ્લાન્ટ ઝડપી ટ્રેક્ટર તથા ૧૦૦ ટન રેતીનો જથ્થો કબ્જે કરી ખાણ ખનીજ વિભાગને જાણ કરી હતી.
ધ્રાંગધ્રા તાલુકા પોલીસની ટીમે, પેટ્રોલીંગ દરમિયાન મળેલી ચોક્કસ બાતમીના આધારે નારીચાણા ગામની સીમમાં દરોડો પાડી ગેરકાયદેસર રીતે ચાલતા રેતીના વોશપ્લાન્ટનો પર્દાફાશ કર્યો હતો.પોલીસે નારીચાણાથી ગાંજણવાવ જતી નદીના કાંઠે કાળીધાર' તરીકે ઓળખાતી સીમમાં દરોડો પાડતાં ગેરકાયદે રેતીનો ચારણો અને વોશપ્લાન્ટ ચાલુ હાલતમાં મળી આવ્યો હતો. પોલીસે સ્થળ પરથી નંબર પ્લેટ વગરનુંઆઈસર ટ્રેક્ટર તેમજ અંદાજે ૧૦૦ ટન વોશ રેતીનો જથ્થો જપ્ત કર્યો હતો.
ગેરકાયદેસર વોશપ્લાન્ટ ચલાવનાર નારીચાણાના રહીશ ગૌતમભાઈ મનસુખભાઈ પટેલ વિરુદ્ધ ગુનો નોંધી કાયદેસરની તપાસ હાથ ધરાઈ છે. આ મામલે સુરેન્દ્રનગર ખાણ ખનીજ વિભાગને પણ દંડ સહિતની આગળની કાયદાકીય કાર્યવાહી માટે બોલાવવામાં આવ્યા હતા.