પાકિસ્તાન માટે જાસૂસીના કેસમાં ધરપકડ કરાયેલી યુટ્યુબર જ્યોતિ મલ્હોત્રાને 18-19 મેની રાત્રે પોલીસ હરિયાણાના હિસાર સ્થિત તેના ઘરે લઈ ગઈ હતી. આ સમય દરમિયાન, જ્યોતિએ ઘરે એક ચિઠ્ઠી છોડી દીધી હતી. જ્યોતિએ આ ચિઠ્ઠી ઘરની નોકરાણીને લખી હતી.

ચિઠ્ઠીમાં લખ્યું છે, "સવિતાને ફળો લાવવા કહેજો, ઘર સંભાળે. હું જલ્દી આવીશ. મને એક મહિનાની પેન્ટોપ-ડી અને ડૉક્ટર ગુપ્તા પાસેથી એક મહિનાની દવા લાવજો." તેની સાથે, તેણીએ તેના પિતા માટે "આઈ લવ યુ" લખ્યું.

પોલીસ અહીંથી લેપટોપ અને ફોન લઈ ગઈ

જ્યારે પોલીસ જ્યોતિ મલ્હોત્રાને તેના ઘરે લઈ ગઈ, ત્યારે તેને તેના પરિવારના સભ્યો સાથે વાત કરવાની મંજૂરી આપવામાં આવી નહીં. તેના પિતા હરીશ મલ્હોત્રાએ ANIને જણાવ્યું હતું કે, પોલીસ રાત્રે જ્યોતિ મલ્હોત્રાને લઈને આવી હતી. તે થોડીવાર રહી અને તેને લઈ ગઈ. આ સમય દરમિયાન કોઈએ મારી સાથે વાત કરી નહીં. પોલીસે અહીંથી લેપટોપ અને ફોન લઈ ગયા.​​​​​​​

જ્યોતિ મલ્હોત્રા અંગે પોલીસનો શું દાવો છે?

૩૩ વર્ષીય જ્યોતિ મલ્હોત્રા 'ટ્રાવેલ વિથ જો' નામની યુટ્યુબ ચેનલ ચલાવે છે. ૧૬ મેના રોજ હરિયાણા પોલીસે તેની ધરપકડ કરી હતી. પોલીસના જણાવ્યા અનુસાર, જ્યોતિ ૨૦૨૩માં પાકિસ્તાન હાઈ કમિશનમાં એહસાન-ઉર-રહીમ ઉર્ફે દાનિશના સંપર્કમાં આવી હતી. ત્યારબાદ તે બે વાર પાકિસ્તાન ગઈ હતી. આ સાથે, તે પાકિસ્તાન હાઈ કમિશનમાં ઘણી વખત દાનિશને મળી.

જ્યોતિના પાકિસ્તાન જવાની ખબર પણ નહોતી

પોલીસે જણાવ્યું હતું કે, ભારત-પાકિસ્તાન તણાવ દરમિયાન, જ્યોતિ મલ્હોત્રા પાકિસ્તાની ગુપ્તચર એજન્સીઓ સાથે સંકળાયેલા લોકો અને એક વ્યક્તિના સંપર્કમાં હતી. જેને પર્સોના નોન ગ્રેટા જાહેર કરવામાં આવ્યો હતો. ભારત સરકારે દાનિશને પાછો મોકલી દીધો છે. જ્યોતિ મલ્હોત્રાના પિતા કહે છે કે તેમને તેમની પુત્રીની ગતિવિધિઓ વિશે ખબર નહોતી. તે ઘરે ફક્ત દિલ્હી જવાની વાત કરતી હતી. હરીશ મલ્હોત્રાએ કહ્યું કે તેમને જ્યોતિના પાકિસ્તાન જવાની ખબર પણ નહોતી.