તું કેમ મારા વિરોધીઓ સાથે ફરે છે અને ખુન્નસ ભરી નજરોથી જુએ છે, તેમ કહી માર માર્યાની પોલીસ ફરિયાદ

જામનગરમાં રબ્બાની પાર્ક વિસ્તારમાં રહેતા એસ્ટેટ બ્રોકર યુવાન પર મસ્તીના એક શખ્સે લોખંડના પાઇપ વડે હુમલો કરી હાથ ભાંગી નાખ્યા ની ફરિયાદ પોલીસમાં નોંધાવાઇ છે. આરોપીએ આવીને કહ્યું હતું, કે તું કેમ મારા વિરોધીઓ સાથે ફરે છે, તેમજ મારી સામે ખુન્નસ ભરી નજરે જુએ છે, તેમ કહી માર માર્યો હતો.

આ ફરિયાદ અંગેના બનાવની વિગત એવી છે કે જામનગરમાં મોરકંડા રોડ પર રબારી પાર્ક શેરી નંબર પાંચમાં રહેતા અને એસ્ટેટ બ્રોકર તરીકેનું કામ કરતા સબીર હનીફભાઈ માજોઠી નામના ૨૩ વર્ષના યુવાને પોતાના ઉપર લોખંડનો ફટકારી હાથનું કાંડુ ભાંગી નાખી ફેક્ચર સહિતની ઈજા પહોંચાડવા અંગે મસિતિયા ગામના આદમ ઉર્ફે વીંછી જુસબભાઈ ખફી નામના શખ્સ સામે ફરિયાદ નોંધાવી છે, જ્યારે તેને જી.જી. હોસ્પિટલમાં સારવાર લેવી પડી છે.

પોલીસ ફરિયાદમાં જાહેર કરાયા અનુસાર ફરિયાદી યુવાન પોતાના મિત્રો સાથે બેઠો હતો, જે દરમિયાન આરોપી પોતાના બાઈકમાં લોખંડનો પાઇપ લઈને ધસી આવ્યો હતો, અને તું કેમ મારા વિરોધીઓ સાથે ફરે છે અને મારી સામે ખુનસ ભરી નજરે શુ કામ જુએ છે? તેમ કહી અચાનક હુમલો કરી દીધો હતો. જે મામલે પોલીસ વધુ તપાસ ચલાવે છે.