સફરજન, પપૈયું અને જામફળ જેવા ફાઈબરથી ભરપૂર ફળો વજન ઘટાડવા માટે મદદરૂપ થાય છે

આજના સમયમાં વિશ્વમાં 'મેદસ્વિતા'ને ગંભીર સ્વાસ્થ્ય સમસ્યાની જેમ માનીને તેનાથી બચવા માટે વિવિધ ઉપાયો કરાઈ રહ્યાં છે. આપણો દેશ પણ આ સમસ્યા સામે લડત આપી રહ્યો છે. મેદસ્વિતાને માત્ર ‘હૃષ્ટપૂષ્ટ' ગણીને અવગણવું જોખમી છે. મેદસ્વિતા મુક્તી એ માત્ર શારીરિક દેખાવ માટે નથી, પરંતુ તે ડાયાબિટીસ, હૃદયરોગ અને બ્લડપ્રેશર જેવા અનેક રોગોનું પ્રવેશદ્વાર હોવાથી માનવના સ્વાસ્થ્યપ્રદ જીવન માટે અનિવાર્ય બની ગઈ છે. મેદસ્વિતા નિયંત્રણ માટે આપણી જીવનશૈલીમાં સ્વાસ્થ્યપ્રદ ફેરફાર લાવવાની અનિવાર્યતા સમજીને ભારત સરકારના 'મેદસ્વિતા મુક્ત ભારત' અભિયાન હેઠળ વિવિધ રીતે મેદસ્વિતામુક્તિ અંગે જાગૃતિ ફેલાવવામાં આવી રહી છે. 

સામાન્ય રીતે લોકો માને છે કે વજન ઘટાડવું એટલે કલાકો સુધી માત્ર કસરતો કરીને પરસેવો પાડવો અને ભૂખ્યા રહેવું. પરંતુ વાસ્તવમાં, વજન ઘટાડવું એ ખાસ કરીને આપણે શું ખાઈએ છીએ તેની જાગૃતિ અને પ્રયત્નપુર્વક કેળવેલી આહાર વિહાર અંગેની સ્વસ્થ આદતો છે. આપણી થાળીમાંથી તળેલ ભોજનો, ખાંડની મીઠાઈની જગ્યાએ 'ફ્રૂટ અને વેજીટેબલ'ને સ્થાન આપવું એ આ દિશામાં પહેલું કદમ છે. આ સાથે સાથે ચા કે કોફીમાં પણ ક્રમશ: ઓછી ખાંડ વાપરવાની ટેવ પાડવી જોઈએ. વધુ પ્રોસેસ્ડ ખાંડવાળા  સોડા અને શરબત જેવા પીણાં બને ત્યાં સુધી ન પીને, મીઠાઈ ઓછી માત્રામાં ખાઈને પણ આહારમાં વધુપડતી ખાંડ નિયંત્રિત કરી શકાય છે.