પરમપાર્ક સામે બનેલો બનાવ : ફીગો કારના ચાલક સામે ફરીયાદ

જામનગર નજીક દરેડ વિસ્તારમાં  પુરઝડપે આવી રહેલી ફીગો કારના ચાલકે જયુપીટર બાઈકને ઠોકરે ચડાવતાં બાઈકના ચાલક જામનગરના આધેડનું ગંભીર ઈજા થવાના કારણે કરુણ મૃત્યુ નિપજ્યું છે.
જામનગર નજીક દરેડ વિસ્તારમાં પરમ પાર્કની સામેના ભાગમાંથી પસાર થઈ રહેલા જીજે૧૦- ડીએચ-૯૫૨૫ નંબરના જયુપીટર મોટરસાયકલ ચાલકને પાછળથી પુરઝડપે આવી રહેલી ફોર્ડ ફીગો કાર નં. જીજે૧૦બીજી-૭૮૭૭ના ચાલકે ઠોકરે ચડાવતાં ગમખ્વાર અકસ્માત સર્જાયો હતો.
 જે અકસ્માતમાં બાઈકના ચાલક જામનગરમાં માધવબાગ વિસ્તારમાં રહેતા મનોજભાઈ દલસાણીયા (ઉંમર વર્ષ ૫૨)નું માથાના ભાગે હેમરેજ સહિતની ગંભીર ઈજા થવાના કારણે ઘટના સ્થળેજ કરુણ મૃત્યુ નીપજ્યું હતું. આ બનાવ અંગે જામનગરમાં માધવબાગ વિસ્તારમાં રહેતા માનવભાઈ મનોજભાઈ દલસાણીયાએ પોલીસને જાણ કરતા, પંચકોશી-બી. ડિવિઝન ના પી.એસ.આઇ. એમ.વી. મોઢવાડિયા ઘટના સ્થળે દોડી ગયા હતા, અને મૃતદેહનો કબજો સંભાળી પોસ્ટમોર્ટમ કરાવ્યું છે, જ્યારે કારના ચાલક સામે ગુનો નોંધી તેની શોધખોળ ચલાવવામાં આવી રહી છે.