તિબેટ અને ચીનમાં ગુરુવારે રાત્રે ભૂકંપના ભયાનક આંચકા અનુભવાયા છે, જેના કારણે સમગ્ર વિસ્તારમાં ભારે દહેશતનો માહોલ સર્જાયો છે. રિક્ટર સ્કેલ પર આ ભૂકંપની તીવ્રતા 7.0 નોંધાઈ છે. આ શક્તિશાળી આંચકા બાદ સમગ્ર વિસ્તારની ધરતી ધ્રૂજી ઊઠી હતી. નેશનલ સેન્ટર ફોર સિસ્મોલોજી (NCS) ના જણાવ્યા અનુસાર, આ વિસ્તારમાં માત્ર 45 મિનિટના ટૂંક સમયગાળામાં એક પછી એક સતત 3 મોટા ભૂકંપના આંચકા અનુભવાયા હતા.

પ્રાપ્ત માહિતી અનુસાર, તિબેટ અને ચીનમાં ગુરુવારે રાત્રે અંદાજે 8:03 વાગ્યે ભૂકંપનો પ્રથમ અને સૌથી તીવ્ર આંચકો આવ્યો હતો. રિક્ટર સ્કેલ પર 7.0 ની તીવ્રતા ધરાવતા આ ભૂકંપનું કેન્દ્રબિંદુ જમીનની સપાટીથી અંદાજે 173 કિલોમીટર ઊંડે નોંધાયું હતું. પ્રથમ આંચકાના થોડા સમય બાદ જ રાત્રે 8:30 વાગ્યે ચીનમાં 5.2 ની તીવ્રતાનો બીજો ભૂકંપ આવ્યો હતો. આ સિલસિલો અહીં અટક્યો ન હતો અને રાત્રે 8:42 વાગ્યે તિબેટમાં ફરી એકવાર 5.0 ની તીવ્રતાનો ત્રીજો આંચકો નોંધાયો હતો. આમ, 45 મિનિટમાં ત્રણ વખત આંચકા આવતા લોકો ભયના માર્યા ઘરોની બહાર દોડી આવ્યા હતા.

જોકે, આ આંચકાઓને કારણે અત્યાર સુધી કોઈ મોટા જાનમાલના નુકસાન કે જાનહાનિના સત્તાવાર અહેવાલો પ્રાપ્ત થયા નથી. પરંતુ, પર્યાવરણ નિષ્ણાતો અને ચીની સંશોધકોએ આ ઘટનાને લઈને ગંભીર ચિંતા વ્યક્ત કરી છે. નિષ્ણાતોના મતે, વૈશ્વિક તાપમાન વધવાને કારણે (ગ્લોબલ વોર્મિંગ) છિંગહાઈ-તિબેટ પઠાર પર આવેલા હિમનદીઓ (ગ્લેશિયર્સ) અત્યંત ઝડપથી પીગળી રહ્યા છે. આ પર્યાવરણીય ફેરફારોને કારણે આ સંવેદનશીલ પહાડી વિસ્તારમાં ભવિષ્યમાં મોટી કુદરતી હોનારતો અને ભૂકંપનું જોખમ સતત વધી રહ્યું છે.

​​​​​​​ઉલ્લેખનીય છે કે આ તિબેટિયન પઠાર બ્રહ્મપુત્રા સહિત એશિયાની અનેક પ્રમુખ અને મહત્વપૂર્ણ નદીઓનું ઉદ્ગમ સ્થાન છે, જે ભારત સહિત અનેક દેશોમાંથી પસાર થાય છે. આથી, આ ક્ષેત્રમાં થઈ રહેલા ભૌગોલિક અને પર્યાવરણીય ફેરફારો નીચાણવાળા વિસ્તારોમાં વસતા લાખો લોકો માટે મોટા ભયનું કારણ બની શકે છે. હાલમાં સ્થાનિક પ્રશાસન અને આપત્તિ વ્યવસ્થાપન ટીમો સ્થિતિ પર સતત નજર રાખી રહી છે.