વાહનચાલકો સામે કાર્યવાહી: તહેવારોને અનુલક્ષીને ટ્રાફિક પોલીસ દ્વારા ખાસ ઝુંબેશ

આગામી દિવસોમાં નવરાત્રી સહિતના તહેવારો આવતા હોય, જેને અનુલક્ષીને દેવભૂમિ દ્વારકા જિલ્લાના મુખ્ય મથક ખંભાળિયામાં ટ્રાફિક પોલીસ દ્વારા ફૂટ પેટ્રોલિંગ સહિતની કાર્યવાહી કરવામાં આવી હતી.

આગામી તહેવારોને ધ્યાનમાં લઈને જિલ્લા પોલીસ વડા નિતેશ પાંડેયની સૂચના મુજબ ટ્રાફિક પી.એસ.આઈ. વી.એમ. સોલંકી તેમજ તેમની ટીમ દ્વારા ગુરુવારે ખંભાળિયાના નગર ગેઈટ, જોધપુર ગેઈટ, ચાર રસ્તા, સહિતના જુદા જુદા વિસ્તારોમાં ફૂટ પેટ્રોલિંગ હાથ ધરવામાં આવ્યું હતું. આટલું જ નહીં, ટ્રાફિકથી ધમધમતા માર્ગો પર નડતરરૂપ વાહન ચાલકો, રેંકડી ધારકો અને પાથરણાવાળાઓ સામે કાર્યવાહી પણ કરવામાં આવી હતી.

આ સાથે ટ્રાફિક પોલીસ દ્વારા નગરજનોને ટ્રાફિક જાગૃતિ અંગેની પત્રિકાનું વિતરણ કરી, ટ્રાફિક નિયમોનું પાલન કરવા પણ અનુરોધ કરવામાં આવ્યો હતો.