જામનગરમાં મહતમ તાપમાનમાં નજીવા ઘટાડા સાથે પારો ૩૬ ડીગ્રી

ભેજમાં પ ટકાનો વધારો: લઘુતમ તાપમાન ૨૩.૧૩

જામનગર અને દ્વારકા જિલ્લામાં ચોમાસાની વિદાય બાદ હવામાનમાં નજીવો ફેરફાર જોવા મળી રહ્યો છે હવામાન ખાતાની આગાહી મુજબ બન્ને જિલ્લામાં આકાશ મુખ્યત્વે સ્વચ્છ રહેવાની શકયતા દર્શાવાઇ છે. દિવસ દરમ્યાન ગરમીનો અનુભવ અને રાત્રીના ઠંડીનો અનુભવ કહી શકાય છે. દરિયાઇ કાંઠાના વિસ્તારમાં ભેજનું પ્રમાણ વધવાની શકયતા દર્શાવાઇ રહી છે.

કંટ્રોલરૂમના જણાવ્યા અનુસાર મહતમ તાપમાનમાં ૦.૪ના ઘટાડા સાથે ૩૬ ડીગ્રીએ પારો પહોંચ્યો છે. જયારે લઘુતમ તાપમાનમાં પણ ઘટાડા સાથે ૨૩.૧૩ ડીગ્રી નોંધાયુ છે. જયારે ભેજનું પ્રમાણ ૯૫ ટકા રહેવા પામ્યુ છે જે ગઇકાલ કરતા ૫ ટકાનો વધારો જોવા મળ્યો છે. જયારે પવનની ગતિ ૪.૩ પ્રતિ કલાક કિ.મી. રહેવા પામી છે. 

હવામાન ખાતા દ્વારા જણાવ્યા અનુસાર જામનગર જિલ્લામાં આકાશ મુખ્યત્વે સ્વચ્છ રહેવાની આગાહી કરવામાં આવી છે તેમજ દિવસ દરમ્યાન તડકો અને ગરમીનો અનુભવ થઇ શકે છે. આગામી દિવસોમાં પણ તાપમાનમાં વધારો થવાની શકયતા દર્શાવાઇ છે. તંત્ર દ્વારા નાગરિકોને ગરમીથી બચવા જરૂરી કાળજી રાખવા તંત્ર દ્વારા અપીલ કરવામાં આવી છે. 

જામનગર જિલ્લાનાં તાલુકા મથકોમાં ચોમાસામાં નોંધાયેલ કુલ વરસાદમાં જામનગર ૧૩, જોડીયા ૧૩.૫, ધ્રોલ ૧૪.૫, કાલાવડ ૯, લાલપુર ૮.૫ અને જામજોધપુરમાં ૧૬ ઇંચ મોસમનો કુલ વરસાદ નોંધાયો છે જયારે જિલ્લાનાં ૩૩ પીએચસી સેન્ટરોમાંથી સૌથી વધુ કાલાવડના નિકાવામાં ૧૬ ઇંચ અને સૌથી ઓછો મોટા ખડબામાં ૧.૭૫ ઇંચ વરસાદ નોંધાયો છે.