પ્રયાગરાજમાં મહાકુંભ મેળા દરમિયાન શિયાળાની અસર સ્પષ્ટપણે દેખાય છે. બે દિવસમાં કુલ ૧૧ લોકોને હૃદયરોગનો હુમલો આવ્યો હતો, જેમાંથી છ શ્રદ્ધાળુઓ પરેડ ગ્રાઉન્ડ ખાતેની સેન્ટ્રલ હોસ્પિટલમાં અને પાંચ શ્રદ્ધાળુઓ સેક્ટર-૨૦ સ્થિત સબ સેન્ટર હોસ્પિટલમાં સારવાર માટે પહોંચ્યા હતા. રાહતની વાત એ છે કે નવ શ્રદ્ધાળુઓને સારવાર બાદ રાહત મળી, જ્યારે બે શ્રદ્ધાળુઓને ગંભીર હાલતમાં SRN હોસ્પિટલમાં રિફર કરવામાં આવ્યા.

હવામાનમાં ફેરફારને કારણે વધી રહ્યા છે કેસ

ગઈકાલે સેન્ટ્રલ હોસ્પિટલનો 10 બેડનો ICU વોર્ડ હૃદયના દર્દીઓથી ભરેલો હતો. ડોક્ટરોનું કહેવું છે કે હવામાનમાં સતત ફેરફારને કારણે હાર્ટ એટેકના કેસ વધી રહ્યા છે અને ભક્તોએ ખાસ સાવચેતી રાખવી જોઈએ.

કેસ 1: મીડિયા રિપોર્ટ્સ અનુસાર, બિહારના રહેવાસી ગોપાલ સિંહ (43) તેના મિત્રો સાથે મહાકુંભમાં આવ્યા હતા. ગઈકાલે સવારે તેમને અચાનક છાતીમાં તીવ્ર દુખાવો થયો. ત્યારબાદ તેમને સેન્ટ્રલ હોસ્પિટલમાં લાવવામાં આવ્યા. તપાસમાં કાર્ડિયોજેનિક શોકની સમસ્યા મળી આવી હતી પરંતુ સારવાર બાદ તે હવે ઠીક છે.

કેસ 2: મીડિયા રિપોર્ટ્સ અનુસાર, મધ્યપ્રદેશના રાયસેનના રહેવાસી સંતદાસજી મેળા વિસ્તારના સેક્ટર-21માં રહેતા હતા. ગઈકાલે સવારે 9:30 વાગ્યે ભોજન કર્યા પછી તે અચાનક બેભાન થઈ ગયા. તેમને તાત્કાલિક સેન્ટ્રલ હોસ્પિટલમાં લાવવામાં આવ્યા, જ્યાંથી તેમને SRN હોસ્પિટલ રિફર કરવામાં આવ્યા.

કેસ 3: મીડિયા રિપોર્ટ્સ અનુસાર, ગ્વાલિયરના શ્યામ લાલ ચંદ્રાણી (65) ગઈકાલે સવારે મેળા વિસ્તારમાં ચાલી રહ્યા હતા ત્યારે તેમને છાતીમાં દુખાવો અને ચક્કર આવવા લાગ્યા. તેમને સબ સેન્ટર હોસ્પિટલમાં લાવવામાં આવ્યા હતા જ્યાં એઈમ્સ રાયબરેલીની ટીમે તેમની તપાસ કરી અને જાણવા મળ્યું કે તેમને હૃદયરોગનો હુમલો આવ્યો હતો. જોકે, તે હવે ઠીક છે.

જો આ લક્ષણો દેખાય તો ડૉક્ટરનો સંપર્ક કરો

• છાતીમાં બળતરા અને દુખાવો
• છાતી પર દબાણની લાગણી
• શ્વાસ લેવામાં તકલીફ
• હાથ, પીઠ, જડબામાં દુખાવો

હૃદયનું રક્ષણ કેવી રીતે કરવું

• કપડાંના અનેક સ્તરો પહેરીને શરીરને આરામદાયક તાપમાન પર રાખો
• ટોપી અને મોજા પહેરો
• સમયસર દવાઓ લો
• સંતુલિત આહાર લો
• પુષ્કળ પાણી પીઓ
• નિયમિત તપાસ કરાવો