ઉત્તર અને પશ્ચિમ જાપાનમાં રેકોર્ડબ્રેક ભારે હિમવર્ષા થઈ છે. મંગળવારે શહેરોમાંથી બરફ સાફ કરવા માટે સૈનિકો અને હજારો સ્નોપ્લોઓએ સંઘર્ષ કર્યો હતો. બરફના તોફાનથી મૃત્યુઆંક 30 પર પહોંચી ગયો છે. જાપાન વિશ્વના સૌથી વધુ બરફ પડતા દેશોમાંનો એક છે, ખાસ કરીને હોક્કાઇડો અને ઓનોશુ ટાપુઓના ઉત્તરીય પ્રદેશોમાં. પરંતુ આ વર્ષે, જાન્યુઆરીના અંતમાં શરૂ થયેલી હિમવર્ષા એટલી તીવ્ર રહી છે કે તેણે ઘણા રેકોર્ડ તોડી નાખ્યા છે.

આઓમોરી શહેરમાં 40 વર્ષનો રેકોર્ડ તૂટી ગયો છે. કેટલાક સ્થળોએ 183 સેમી (લગભગ 6 ફૂટ) બરફ પડ્યો, જે સરેરાશ કરતાં બમણાથી વધુ છે. એક સ્થળે સૌથી વધુ બરફ 4.54 મીટર (14 ફૂટથી વધુ) નોંધાયો હતો. સપ્પોરો જે  હોક્કાઇડોનું સૌથી મોટું શહેર છે જ્યાં 1,000થી વધુ બરફના હળથી 3,800 કિમી રસ્તાઓ પરથી બરફ સાફ કરવાનું શરૂ કર્યું છે. હોક્કાઇડોનું મુખ્ય એરપોર્ટ ગયા અઠવાડિયે અસ્થાયી રૂપે બંધ કરાવામાં આવ્યું હતું, જેનાથી સેંકડો મુસાફરો ફસાયા હતા. તેમજ ટ્રેનો મોડી પડી હતી અને હાઇવે બંધ હતા.

ફાયર એન્ડ ડિઝાસ્ટર મેનેજમેન્ટ એજન્સીના જણાવ્યા અનુસાર, 20 જાન્યુઆરીથી અત્યાર સુધીમાં 30 લોકોના મોત થયા છે, જ્યારે 100થી વધુ લોકો ગંભીર રીતે ઘાયલ થયા છે. મોટાભાગના મૃત્યુ છત પરથી બરફ સાફ કરતી વખતે પડી જવાથી થયા છે. ઘણા વૃદ્ધ લોકો બરફ સાફ કરવા માટે છત પર ચઢી રહ્યા હતા, પરંતુ તેઓ લપસી ગયા અને પડી ગયા, જેના કારણે બરફના ઢગલા નીચે ફસાઈ ગયા. 91 વર્ષીય એક મહિલા તેના ઘરની બહાર ત્રણ મીટર બરફ નીચે દટાયેલી મળી આવી હતી. સૌથી વધુ મૃત્યુ નિગાતા પ્રીફેક્ચર (12), અકીતા (6) અને આઓમોરી (4)માં થયા હતા.

જાપાનની સૈન્યને બોલાવવામાં આવી હતી. આઓમોરીમાં, 21 વર્ષમાં પહેલી વાર સેનાએ છત અને રસ્તાઓ પરથી બરફ સાફ કરવામાં મદદ કરી હતી. સ્થાનિક સરકારો વૃદ્ધો અને એકલા રહેતા લોકોને મદદ કરવા માટે સૈન્યને અપીલ કરી રહી છે. હિમપ્રપાત અને છત પરથી બરફ પડવાના જોખમને કારણે ચેતવણી જારી કરવામાં આવી છે.

જાપાન 36 વર્ષમાં પહેલી વાર શિયાળાના મધ્યમાં રવિવારે સામાન્ય ચૂંટણી યોજી રહ્યું છે. આટલો ભારે બરફ મતદાનને અસર કરી શકે છે. લોકો તેમના ઘરો છોડી શકતા નથી. વાહનવ્યવહાર ખોરવાયો છે, તેથી મતદાન ઓછું રહેવાની ધારણા છે. જાપાનમાં શિયાળો કઠોર હોય છે, પરંતુ આ વર્ષે હવામાન અસામાન્ય રહ્યું છે. દરિયામાંથી આવતા ઠંડા પવનો અને બરફના તોફાનોને કારણે રેકોર્ડ હિમવર્ષા થઈ છે. આ પરિસ્થિતિ જનતા માટે પડકારજનક છે. સરકાર લોકોને છત સાફ કરતી વખતે સાવચેત રહેવા અને જરૂર પડ્યે મદદ લેવા વિનંતી કરી રહી છે.