અમેરિકાના મિશિગન રાજ્યમાં થયેલા ગોળીબારની ઘટનાએ સમગ્ર વિસ્તારમાં ચકચાર મચાવી દીધી છે. ઉત્તરી મિશિગનના મિસાઉકી કાઉન્ટીમાં એક શંકાસ્પદ વ્યક્તિએ પાંચ લોકોની ગોળી મારીને હત્યા કરી હોવાની માહિતી સામે આવી છે. પોલીસની શોધખોળ દરમિયાન શંકાસ્પદ વ્યક્તિ પણ મૃત હાલતમાં મળી આવ્યો હતો. ગોળીબારમાં ઘાયલ થયેલા એક વ્યક્તિને હોસ્પિટલમાં સારવાર માટે દાખલ કરવામાં આવ્યો છે.

મિશિગન સ્ટેટ પોલીસના જણાવ્યા અનુસાર, શુક્રવારે સવારે આશરે 11:40 વાગ્યે મિસાઉકી કાઉન્ટીમાં આવેલા એક ઘરમાં ગોળીબાર થયાની જાણ થતાં પોલીસ ઘટનાસ્થળે પહોંચી હતી. અધિકારીઓને ત્યાં ત્રણ લોકો મૃત હાલતમાં મળી આવ્યા હતા, જ્યારે એક વ્યક્તિ ગોળી વાગવાથી ગંભીર રીતે ઘાયલ થયો હતો. ઘાયલ વ્યક્તિને તાત્કાલિક હોસ્પિટલમાં ખસેડવામાં આવ્યો હતો.

પોલીસના આગમન પહેલાં જ શંકાસ્પદ વ્યક્તિ ઘટનાસ્થળેથી ફરાર થઈ ગયો હતો. તપાસ દરમિયાન તેની ઓળખ 39 વર્ષીય ચાડ હિકમેન તરીકે કરવામાં આવી હતી. પોલીસ અને તપાસકર્તાઓએ સમગ્ર વિસ્તારમાં તેની શોધખોળ શરૂ કરી હતી. આ દરમિયાન તપાસકર્તાઓને નજીકના બીજા એક ઘરમાંથી વધુ એક મૃતદેહ મળી આવ્યો હતો. જેના કારણે મૃતકોની સંખ્યા પાંચ થઈ હતી.

શોધખોળ દરમિયાન પોલીસને હિકમેનનું વાહન વ્હિટલોક તળાવ નજીકના જંગલવાળા વિસ્તારમાં મળી આવ્યું હતું. ત્યારબાદ કરવામાં આવેલી તપાસમાં હિકમેન સહિત બે લોકો મૃત હાલતમાં મળી આવ્યા હતા. પ્રાથમિક માહિતી અનુસાર, શંકાસ્પદ વ્યક્તિનું પણ મોત થયું છે અને હવે પોલીસ સમગ્ર ઘટનાક્રમ પાછળનું કારણ તથા ગોળીબારની પરિસ્થિતિ અંગે તપાસ કરી રહી છે.

મિશિગન સ્ટેટ પોલીસની લેફ્ટનન્ટ એશ્લે મિલરે આ ઘટનાને સમુદાય માટે અત્યંત હૃદયદ્રાવક ગણાવી હતી. તેમણે જણાવ્યું હતું કે આ સમગ્ર પરિસ્થિતિ તપાસકર્તાઓ માટે પણ પડકારજનક છે.

પોલીસે હજુ સુધી ગોળીબારમાં મૃત્યુ પામેલા લોકોના નામ, ઉંમર કે લિંગ અંગે માહિતી જાહેર કરી નથી. પરિવારજનોને સત્તાવાર રીતે જાણ કરવાની પ્રક્રિયા ચાલી રહી હોવાથી તેમની ઓળખ હાલ જાહેર કરવામાં આવી નથી. પોલીસ દ્વારા ઘટનાની વધુ તપાસ હાથ ધરવામાં આવી છે અને ગોળીબાર પાછળનું ચોક્કસ કારણ જાણવા પ્રયાસો ચાલુ છે.