અમેરિકના ઉત્તર કેરોલિનામાં એક ગંભીર પ્લેન દુર્ઘટના બની હતી જેમાં ભૂતપૂર્વ નેસ્કાર સ્ટાર ગ્રેગ બિફલ, તેમની પત્ની અને તેમના બે બાળકો સહિત સાત લોકોએ જીવ ગુમાવ્યા છે.જેના પગલે રેસિંગ જગત આઘાતમાં ગરકાવ બની ગયું છે.ગુરુવારે સવારે ઉત્તર કેરોલિનામાં સ્ટેટ્સવિલે પ્રાદેશિક એરપોર્ટ નજીક એક ખાનગી વિમાન ક્રેશ થયું હતું, જેમાં નિવૃત્ત નેસ્કાર ડ્રાઇવર ગ્રેગ બિફલ, તેમની પત્ની અને તેમના બાળકો સહિત સાત લોકો મુસાફરી કરી રહ્યા હતા.

અધિકારીઓના જણાવ્યા અનુસાર, સેસ્ના સી550 બિઝનેસ જેટ સવારે 10 વાગ્યે સ્ટેટ્સવિલે એરપોર્ટથી ફ્લોરિડા માટે રવાના થયું હતું. જોકે, ટેકઓફ કર્યાના થોડા સમય પછી, પાઇલટે એક સમસ્યા જોઈ અને વિમાનને એરપોર્ટ પર પાછું લાવવાનો પ્રયાસ કર્યો. જો કે આ દરમિયાન વિમાને કાબુ ગુમાવ્યો અને જમીન પર અથડાયું. આ અકસ્માતને કારણે ભારે આગ લાગી, જેમાં તમામ મુસાફરો સ્થળ પર જ મૃત્યુ પામ્યા.

આ ભયાનક અકસ્માત ચાર્લોટથી લગભગ 72 કિલોમીટર ઉત્તરમાં થયો હતો. ઉત્તર કેરોલિના સ્ટેટ હાઇવે પેટ્રોલના જણાવ્યા અનુસાર, વિમાન ઝડપથી નીચે ઉતર્યું અને તેમાં આગ ફાટી નીકળી. તે સમયે વિસ્તારમાં હળવો વરસાદ પડી રહ્યો હતો. વિમાનમાં નોંધણી કરાવનાર કંપની ગ્રેગ બિફલ સાથે સંકળાયેલી હોવાનું કહેવાય છે.

ગ્રેગ બિફલ તેમની પત્ની ક્રિસ્ટીના, તેમના પાંચ વર્ષના પુત્ર રાયડર અને તેમની 14 વર્ષની પુત્રી એમ્મા સાથે વિમાનમાં હતા. નજીકના પરિવારના મિત્રો અને તેમના બાળકો પણ આ દુર્ઘટનામાં મોત પામ્યા હતા. અકસ્માત સમયે નજીકના લેકવુડ ગોલ્ફ ક્લબમાં હાજર લોકો ઘટનાસ્થળ જોઈને સ્તબ્ધ થઈ ગયા હતા. ગોલ્ફ કોર્સના એક ભાગમાં કાટમાળ વિખરાયેલો હતો. હાલમાં આ અકસ્માતની તપાસ નેશનલ ટ્રાન્સપોર્ટેશન સેફ્ટી બોર્ડ અને ફેડરલ એવિએશન એડમિનિસ્ટ્રેશન દ્વારા કરવામાં આવી રહી છે. તપાસ પૂર્ણ થયા પછી જ અકસ્માતનું સાચું કારણ નક્કી થશે.