મહિલા સહિતના પોલીસ સ્ટેશનમાં પરિણીતાઓ દ્વારા સાસુ સહિતના સાસરિયા સામે ફરિયાદ નોંધાવવામાં આવતી હોવાનું અનેક વાર જોવા મળ્યું છે પરંતુ આજીડેમ પોલીસ સ્ટેશનમાં 72 વર્ષીય સાસુએ પુત્રવધુ સામે મારમારી હાથમાં બટકું ભરી લીધાની ફરિયાદ નોંધાવતા પોલીસે ગુનો નોંધ્યો છે.

મહીકા ગામે રાધિકા રેસીડેન્સી શેરી નં-1મા પુત્ર સાથે રહેતા નીલમબેન સુરેશભાઈ કાચા (ઉ.વ.72)ના રાત્રીના મોટા દીકરા અલ્પેશભાઈના ઘરેથી આવ્યા ત્યારે નાના પુત્ર કમલેશની રિસામણે રહેલી પત્ની કાજલ ઘરે હતી અને પતિને કહેવા લાગી હતી કે, તારા માં બાપને સાથે રાખીશ નહીં અને મારે પણ તેની સાથે રહેવું નથી, તેને કહી દેજે અહીંથી ચાલ્યા જાય, આ બાબતે પતિ કમલેશભાઈ અને સાસુ નીલમબેન સમજાવવા જતા પુત્રવધુ કાજલ ઉશ્કેરાઈ હતી અને ગાળો આપી સાસુ સાથે મારામારી કરી હાથમાં બટકું ભરી લીધું હતું. અને ડોશી તારે ઘરનું પગથિયું ચડવું નહીં નહીંતર પતાવી દઈશ તેમ ધમકી આપી પતિ કમલેશભાઈ સાથે પણ મારામારી કરવા લાગી હતી. ત્યાર બાદ કહેવા લાગી હતી કે, હું હમણાં બેભાન થઈને હોસ્પિટલમાં દાખલ થઇ જાઉં છું, બધાનું નામ લખાવી તમને જીવવા જેવા નહીં રહેવા દઉં કહી 108માં ફોન કરી દીધો હતો અને 108 આવતા પોતે તેમાં બેસી ગઇ હતી. પુત્રએ વૃધ્ધાને પણ બેસાડી સિવિલ હોસ્પિટલમાં લઇ ગયા હતા. જ્યાં સારવાર આપવામાં આવી હતી. બનાવ અંગે વૃધ્ધાની ફરિયાદ પરથી પુત્રવધુ કાજલ કમલેશભાઈ કાચા સામે ફરિયાદ નોંધાવતા પોલીસે ગુનો નોંધી આગળની તપાસ હાથ ધરી છે.