​​​​​​​આઈપીએલ 2025 કંઈક ખાસ અને અલગ રીતે યોજાઈ શકે છે. કારણકે IPL 2025 માટે મેગા ઓક્શન આ વર્ષના ડિસેમ્બર અને ફેબ્રુઆરીમાં યોજાવા જઈ રહ્યું છે, જેમાં ઘણા ખેલાડીઓ અન્ય કેમ્પમાં જઈ શકે છે. ત્યારે રોયલ ચેલેન્જર્સ બેંગ્લોરમાં પણ ઘણા ફેરફાર જોવા મળી શકે છે. મેગા ઓક્શન પહેલા રોયલ ચેલેન્જર્સ બેંગ્લોરના સ્ટાર ખેલાડીઓમાંથી એક ગ્લેન મેક્સવેલે મોટું પગલું ભર્યું છે. તેણે રોયલ ચેલેન્જર્સ બેંગ્લોરના ઈન્સ્ટાગ્રામ પેજને અનફોલો કરી દીધું છે.

મેક્સવેલે અનફોલો કર્યું રોયલ ચેલેન્જર્સ બેંગ્લોરને

ઓસ્ટ્રેલિયાના ઓલરાઉન્ડર ગ્લેન મેક્સવેલે તાજેતરમાં રોયલ ચેલેન્જર્સ બેંગ્લોરને ઈન્સ્ટાગ્રામ પર અનફોલો કરીને ચોંકાવનારું પગલું ભર્યું છે. આ પગલાથી ક્રિકેટ જગતમાં ખળભળાટ મચી ગયો છે અને એવી અટકળો છે કે આ પગલું IPL 2025ની મેગા ઓક્શન પહેલા લેવામાં આવ્યું છે. T20 લીગની પ્રકૃતિ અને ટીમની જરૂરિયાતોને જોતાં  ફ્રેન્ચાઇઝીઓ ઘણીવાર તેમની ટીમમાં ફેરફાર કરવાનું વિચારે છે. તાજેતરમાં જ મેક્સવેલના ઇન્સ્ટાગ્રામ પર રોયલ ચેલેન્જર્સ બેંગ્લોરને અનફોલો કરવાથી ટીમમાંથી તેની સંભવિત બહાર નીકળવાની અટકળોને વધુ મજબૂતી મળી છે.

ગ્લેન મેક્સવેલ 2021 માં રોયલ ચેલેન્જર્સ બેંગ્લોર સાથે જોડાયો હતો

આઈપીએલ 2021ની હરાજીમાં 14.25 કરોડ રૂપિયાની કિંમતે ખરીદાયેલો મેક્સવેલ રોયલ ચેલેન્જર્સ બેંગ્લોર માટે મહત્વનો ખેલાડી રહ્યો છે. IPL 2023માં તેણે શાનદાર ફોર્મ બતાવ્યું અને 14 મેચમાં 400 રન બનાવ્યા. જોકે IPL 2024માં તેનું પ્રદર્શન ખરાબ રહ્યું હતું. ત્યારે તેણે 10 મેચમાં માત્ર 52 રન બનાવ્યા હતા.

ગ્લેન મેક્સવેલનું IPL પ્રદર્શન

ગ્લેન મેક્સવેલ આઈપીએલમાં અત્યાર સુધી 134 મેચ રમી ચૂક્યો છે. આ 134 મેચોમાં તેણે 156.73ના સ્ટ્રાઈક રેટથી 2771 રન બનાવ્યા છે. જેમાં 18 અડધી સદી સામેલ છે. આ સિવાય આ 134 મેચોમાં ગ્લેન મેક્સવેલે 8.28ની ઈકોનોમી સાથે 37 વિકેટ લીધી છે.